Павлодар облыстық ТЖД баспасөз қызметінің мәліметінше, құтқарушылар «Майқайыңалтын» АҚ аумағында жоғары қауіпті режимде жұмыс істеп жатыр, деп хабарлайды Ulysmedia.kz.
Оқиға орнында Павлодар облысының әкімі Асайын Байханов пен ТЖ вице-министрі Мереке Пішембаев жүр.
Төтеншеліктердің айтуынша, әлі де топырақ сырғып кетуде, үйіндінің шеті тұрақсыз.
– Іздеу жұмыстарына Астана қаласы мен Павлодар облысы ТЖД кинологиялық қызметі қосылды, – дейді департаментте.
Оқиға орнында ТЖМ, полиция, кәсіби әскерилендірілген авариялық-құтқару қызметтері республикалық орталық штабы, «103» қызметі бөлімшелерінен, сондай-ақ жергілікті атқарушы органдардан барлығы 116 адам мен 23 техника жұмылдырылды.
Естеріңізге салсақ, 4 қаңтарда сағат 01-25 шамасында Баянауыл ауданында «Майқайыңалтын» АҚ аумағында, Майқайың кеніші шахтасының маңында төрт жолаушысы бар автобус тазарту кеңістігіне құлап кетті.
