Қызылорда облысында 50 жылдан бері КСРО-ның паспортымен жүрген азамат жаңа жеке куәлігін алды, деп хабарлады Ulysmedia.kz Polisia.kz-ке сілтеме жасап.
Қызылорда облысы Қазалы аудандық полиция бөлімінің көші-қон қызметі бөлімшесі қызметкерлері КСРО-ның 1974 жылғы ескі үлгідегі паспортымен жүрген азаматтарды анықтап, оларды барлық мүмкіндікті тиімді пайдалана отырып тез арада құжаттандыру мақсатында жоспарлы іс-шаралар жүргізіп жатыр.
ҚАЗАЛЫ АУДАНЫНДА ТАҒЫ 1974 ЖЫЛҒЫ ПАСПОРТПЕН ЖҮРГЕНДЕР БАР
Қазалы ауданы тұрғындарынан КСРО-ның 1974 жылғы ескі үлгідегі қызыл паспортымен жүрген және уақытылы құжаттанбаған бір азаматтан өтініш түсті. Содан полиция қызметкерлері осы азаматтың Қазақстан Республикасының азаматтығына қатыстылығы жөнінде құжаттар жинақтап, құжаттандыру жұмыстарын жүргізді.
Осылайша, облыс тұрғыны жаңа жеке куәлігін алды. Аудан тұрғыны Қазалы ауданы полиция бөлімінің көші-қон қызметі бөлімшесінің қызметкерлеріне алғыс айтты.
Қазір Ішкі істер министрлігі азаматтарға жеке куәліктердің жаңа түрін бере бастады.
