Жамбыл облысының полиция департаменті Шуда жұмбақ жағдайда қайтыс болған жүкті әйелдің өліміне қатысты мәлімдеме жасады, деп хабарлайды Ulysmedia.kz.
ОҚИҒА ТУРАЛЫ
25 жастағы жас ана Әдемі Ешеналиеваның мәйітін қойма ішіне жасырып қойған дейді жақындары. Сұмдық жағдай Шу аудандық көпбейінді орталық ауруханасында болған. Науқастың қалай, қандай жағдайда қаза тапқаны белгісіз. Өйткені ауыр жағдайда ауруханаға жеткізілген Әдемі Ешеналиеваны дәрігерлер әжетхана ішінде ес түссіз күйде жатқанда көріпті.
Жақындарының сөзінше, Әдемі телефонмен сөйлескен сайын дәрігерлердің салақтығына жиі шағымданған екен. Соңғы хабарламасында жолдасына “ауруханадан гөрі халық еміне жүгінейік” деп жалыныпты. Бірақ жансақтау бөлімінде жатыр деп Әдемінің қасына ешкімді жуытпапты.
Марқұмның күйеуі жүкті әйелінің мүрдесін перзентхана жертөлесінен тауып алған.
ПОЛИЦИЯ НЕ ДЕЙДІ
Жамбыл облысының полиция департаментінің мәліметінше, бұл дерек бойынша Қылмыстық кодекстің 317-бабы 3-бөлімі бойынша сотқа дейінгі тергеу амалдары басталған.
- Комиссиялық сот-медициналық сараптама тағайындалды. Сонымен қатар, денсаулық сақтау министрлігінің медициналық және фармацевтикалық бақылау комитетінің Жамбыл облысы бойынша департаменті Шу қалалық ауруханының қызметкерлеріне қатысты қызметтен тыс тексеру жүргізу туралы сот сұраныс жолданды. Толық мән-жайды анықтау үшін полиция қызметкерлері жан-жақты тексеріс жүргізіп жатыр, дейді Жамбыл облысы ПД ресми өкілі Гүлсара Мұхтарқұлова.
