ТЖД Ақмола облысындағы су тасқыны жағдайының күрделенуіне байланысты Бұланды ауданының Макинск қаласында апаттың салдарын жою бойынша жұмыстар жүргізіп жатыр, деп хабарлайды Ulysmedia.kz.
ШЕНЕУНІКТЕР ӨҢІРДЕ
ТЖ министрінің тапсырмасы бойынша оқиға орнында вице-министр Рамиль Камалов барды. Сонымен қатар ауданға облыс әкімі Марат Ахметжанов келді.
Су тасқыны салдарын жоюға облыстың ТЖД қатысуда, сондай-ақ Көкшетау, Атбасар және Астана қалаларынан бөлімшелер тартылды. Жақын арада Қарағанды облысының ТЖД-нан қосымша топ келеді деп күтілуде.
Макинскіде бөгеттерді нығайту және тұрғын алаптарды қорғау үшін инертті материалы бар қапшықтарды төсеу жұмыстары жалғасуда. Жоюға жеке құрамнан 400-ге жуық адам және 100-ге жуық арнайы техника жұмылдырылған. Тасқын суларды тиімді өткізу үшін автожолдарды ашу туралы шешім қабылданды. Бұл шара елді мекенге гидравликалық жүктемені азайтуға және су басу қаупін азайтуға мүмкіндік береді.
ҮЙЛЕРДІ СУ БАСТЫ
Еске салайық, 4 сәуірде Ақмола облысының Макинск қаласындағы үйлерді су басқаны хабарланған болатын. Әлеуметтік желіде қаладағы қазіргі жағдай туралы видеолар тарады. Видеодан қаладағы көшені су басқанын көруге болады.
