Су ресурстары және ирригация вице-министрі Нұрлан Алдамжаров Түркістан облысында қуаңшылық салдарынан мал қырылды деген ақпаратты жоққа шығарды, деп хабарлайды Ulysmedia.kz.
Бұл сұрақты Ulysmedia.kz тілшісі су ресурстары және ирригация вице-министрі Нұрлан Алдамжаровқа қойған болатын. Ол Түркістан облысында малдың жаппай қырылуы жөніндегі ақпарат расталмағанын айтты.
Бұл ақпаратты көрдім. Түркістан облысының әкімі бұл фактіні растаған жоқ. Облыс аумағында малдың қырылуы тіркелген жоқ. Сонымен қатар, біздің министрлік тек суармалы немесе тәуелді жерлерге су жеткізу мен ирригациялық жүйелерге жауап береді. Біздегі егістік инспекциялары да бұл деректі жергілікті жерлерде тексерді. Қуаңшылық салдарынан малдың қырылуы расталмады, – деді Алдамжаров Орталық коммуникациялар қызметіндегі брифингте.
КОНТЕКСТ
Бұған дейін Түркістан облысының кейбір ауданында қатты ыстық пен жауын-шашынның жоқтығынан жайылымдар қурап, малға азық жетіспей жатқаны хабарланған еді. Алайда Келес ауданының кәсіпкерлік және ауыл шаруашылығы бөлімі жағдайға қатысты өтемақы төленбейтінін мәлімдеді, себебі мұндай төлемдер тек төтенше жағдай жарияланған кезде ғана қарастырылады.
