Ақтауда арзан ет сатамын деп жұртты алдаған әйелдің әрекеті әшкереленді, деп хабарлайды Ulysmedia.kz.
TikTok-тағы жалған сауда
Lada.kz мәліметінше, 27 қараша күні облыс орталығының тұрғыны TikTok әлеуметтік желісінде «aktauetsupnaborzakaz» атты аккаунт арқылы ет өнімдерін төмен бағамен сататыны жөнінде хабарландыру жариялаған. Ұсынысқа сенген тұрғындар белсенді түрде тапсырыс бере бастаған.
400 мың теңге жинап үлгерген
Әйел адам 10 желтоқсанға дейін «алдағы жеткізілімдер» үшін алдын ала төлем жинап, шамамен 400 мың теңге көлемінде қаражат алған. Алайда оның әрекетін киберқылмысқа қарсы іс-қимыл басқармасы әшкереледі.
20-дан астам жәбірленуші анықталды
Құқық қорғау органдарының мәліметінше, қазіргі таңда 20-дан астам жәбірленуші анықталған.
Қылмыстық іс қозғалды
Бұл дерек бойынша 2025 жылғы 22 желтоқсанда Маңғыстау облыстық полиция департаменті ҚР Қылмыстық кодексінің 190-бабы 3-бөлігінің 1-тармағы («Алаяқтық») бойынша қылмыстық іс тіркеді. Күдіктіге қатысты елден шықпау туралы қолхат түріндегі бұлтартпау шарасы қолданылды. Қазіргі уақытта тергеу амалдары жүргізіліп жатыр.
