Премьер-министрдің орынбасары Роман Скляр Алматыдағы сейсмикалық дайындық бар екенін айтып, алаңдауға негіз жоқ деп санайды, деп хабарлайды Ulysmedia.kz.
«Қазір алаңдауға негіз жоқ деп есептеймін. Жауапты адамдар ол мәселемен айналысады. Өз жұмыстарына жауапты, құжаттарға қол қойды», - деді Скляр жұма күні Сенатта Алматының сейсмикалық дайындығы туралы сұраққа берген жауабында.
Ол ғимараттарды жобалау жұмыстарымен Қазақстан құрылыс және сәулет ғылыми-зерттеу институты айналысатынын еске салды. Олардың сараптамасы бойынша «нысандар құрылыс нормаларына сәйкес салынып жатыр».
Еске салайық, 6 ақпанда Түркияның оңтүстік-шығысында 7,7 және 7,6 балдық жер сілкінісі болды. Зілзала елдің 10 провинциясы мен көршілес мемлекеттерде сезілді. Түркия мен Сирия ең көп зардап шеккен. Соңғы мәліметтер бойынша, табиғи апат салдарынан 38 мыңнан астам адам қаза тауып, 108 мыңнан астамы жарақат алған.
Президент Қасым-Жомарт Тоқаев үкіметке Түркияға көмектесу үшін 1 миллион доллар бөлуді тапсырды. Бұған дейін Қазақстаннан Түркияға қосымша гуманитарлық жүк тиелген ұшақ ұшқан болатын.
Ал, қазақстандық құтқарушылар Түркияның оңтүстігіндегі жойқын жер сілкінісі болған жерде жедел іздестіру-құтқару жұмыстарын жалғастырып жатыр. Әзірге аман қалған жеті адамды құтқарды. Түркияға жіберілген қазақстандық құтқарушылар мен дәрігерлер марапатқа ұсынылады.
2022 жылдың қыркүйегінде Төтенше жағдайлар министрлігінің басшысы Юрий Ильин Алматыда жер сілкінісі кезінде су қоймаларының дамуы қауіп төндіретінін мәлімдеген еді.
