Маңғыстау облысының әкімі Нұрлан Ноғаевқа тұрмыстық қатты қалдықтар полигонын қайта құру жобасы ұсынылды, деп хабарлайды ulysmedia.kz.
Маңғыстау облысы әкімі баспасөз қызметінің хабарлауынша, Қасым-Жомарт Тоқаев Маңғыстау облысына сапары барысында Маңғыстау облысының әлеуметтік-экономикалық дамуына арналған кеңесте жергілікті экологиялық проблемалар туралы айтқан. Президент үкімет пен облыс әкімдігіне үш жыл ішінде қатты тұрмыстық қалдықтарды жинау, сұрыптау және өңдеу бойынша интегралды инфрақұрылым құруды, сондай-ақ полигондарды нормативтік талаптарға сәйкестендіруді тапсырды.
Бүгінгі таңда Мұнайлы ауданының Баянды ауылдық округінде полигонды қайта жаңартудың екінші кезеңі жүргізілуде. Бұл полигон жұмысын 2015 жылы бастады. Ол жалпы көлемі 25 гектар болатын алты шұңқырдан тұрады. Полигон жұмыс істегеннен бері мұнда Ақтау қаласы мен Мұнайлы ауданының барлық қатты тұрмыстық қалдықтары әкелінді. Алайда, техника мен жабдықтардың жетіспеушілігі болашақта аймаққа елеулі эпидемиологиялық қауіп төндіруі мүмкін, сондықтан қазіргі уақытта сұрыптау желілерін орнату – басты міндет.
