10 сәуірден бастап Жамбыл және Түркістан облыстарында жанар-жағармайды елден әкетуге жол бермеу бойынша рейд жүргізіліп жатыр, деп хабарлайды Ulysmedia.kz.
ІІМ мәліметінше, полиция қызметкерлері тиісті рұқсатсыз қосымша жанармай бактарын орнатып алған көліктерге баса назар аударады.
«Бұл құқықбұзушылық үшін ҚР Әкімшілік құқықбұзушылық туралы кодекстің 590-бабы 7-бөлігі бойынша әкімшілік жауапкершілік қарастырылады (Тиісті рұқсатсыз қайта жабдықталған көлік құралын басқару). Іс-шараның үш күнінде осындай құқық бұзушылықтар жасағаны үшін 57 жүргізуші жауапқа тартылды, 21 әкімшілік материал бойынша көлік құралдарын одан әрі пайдалануға тыйым салынды», - делінген мәліметте.
Айта кетейік, жыл басынан бері Қазақстан аумағынан жанар-жағармай өнімдерін заңсыз алып кетудің 288 фактісінің жолы кесілген.
Бұдан бұрын Түркістан облысында Өзбекстанға мұнай өнімдерін заңсыз тасымалдағандар ұсталған.
