Қазіргі уақытта Қазақстанда астық, мұнай өнімдері, көмір және басқа да тауарлардың саудасын жүзеге асыратын 10 тауар биржасы жұмыс істейді. Бұл туралы Ulysmedia.kz үкіметтің баспасөз қызметіне сілтеме жасап хабарлайды.
Тауар биржалары не үшін қажет?
Биржаның негізгі міндеті – ашық нарықтық баға мен бәсекені қалыптастыра отырып, сауданы ұйымдастыру.
Қазақстандағы тауар биржаларының жағдайы
Премьер-министр Әлихан Смайыловтың айтуынша, биржалық сауда-саттықтан үлкен үміттер күтілген.
«Соңғы бес жылда заңнама екі рет өзгерді. Дегенмен, биржалар нарықта әлі де өз міндетін толық орындай алмай отыр», – деді ол.
Жалпы, бұл қызметтің дамуындағы негізгі мәселелердің бірі – жер қойнауын пайдаланушылардың тауар биржаларын өз қажеттіліктеріне пайдалануы.
«Бүгінде айырбастау нарығының басым бөлігі дәл осындай сатып алуларға қызмет көрсетуге бағытталған. Мұнда жергілікті қамтуды сақтау бойынша міндеттер жоқ. Салдарынан жыл сайын 1 триллион теңгеден астам қаржы біздің бизнеске түспейді. Оған жол бермеу керек. Жер қойнауын пайдаланушылардың сатып алу жұмыстары ел үшін жұмыс істеуі керек. Жергілікті қамтуды кеңейту және өндірісімізді әртараптандыру маңызды», – деді премьер-министр.
Тағы бір мәселе – тауар биржаларының микрокәсіпкерлік субъектілері болып бағалануы. Бұл оларға өте төмен салық жарналарын жасауға және тексерулерден аулақ болуға мүмкіндік береді.
Смайылов екi күн мерзiмде биржалық сауда мәселелерi жөнiндегi заң жобасы бойынша үкiметтiк қорытынды жобасын келiсудi, дүниежүзiлiк стандарттарды ескере отырып, тауар биржасы бағдарламалық қамтамасыз етудiң ақпараттық қауiпсiздiгiн арттыру мәселесiн пысықтауды, сондай-ақ Әкімшілік құқық бұзушылық туралы кодекске тауар биржаларының және оларға қатысушылардың жауапкершілігін күшейту бойынша өзгерістерді әзірлеуді тапсырды.
Оралхан ҚОЖАНОВ
