Су тасқынынан зардап шеккен 5 239 отбасыға арнайы салынған және сатып алынған үйлер мен пәтерлер берілді, деп хабарлады Ulysmedia.kz primeminister.kz-ке сілтеме жасап.
5 239 ОТБАСЫҒА ҮЙЛЕР МЕН ПӘТЕРЛЕР БЕРІЛДІ
Үкімет су тасқынынан зардап шеккен отбасыларға тұрғын үй салу және сатып алу, сондай-ақ оларға жан-жақты көмек көрсету бойынша өңірлерде жүргізіліп жатқан жұмыстарды тұрақты бақылауда ұстауда, - делінген хабарамада.
Қираған баспанасының орнына 4769 отбасы жаңа үй мен пәтерлерге ие болды. Сонымен қатар зардап шеккен өңірлерде 2568 жаңа үйдің құрылысы қарқынды түрде жүргізіліп жатыр, оның ішінде 470 нысан бойынша жұмыстар толығымен аяқталып, тұрғындарға кілттер табысталды. Солтүстік Қазақстан облысында құрылысы аяқталған 285 үй, Қостанай облысында – 57, Батыс Қазақстан облысында – 80, Ақтөбе облысында – 43 және Павлодар облысында – 5 үй пайдалануға берілді.
СУ БАСҚАН ҮЙЛЕРДІ ТЕКСЕРУ АЯҚТАЛДЫ
Барлық облыста су басқан тұрғын үйлерді тексеру және бағалау жұмыстары 100% аяқталды. Жалпы сомасы 49,3 млрд теңгеге 8 853 отбасы тұрғын үйді жөндеуге және қалпына келтіруге тиісті төлем алды.
34 216 отбасыға 12,6 млрд теңгеге 100 АЕК мөлшерінде біржолғы өтемақы төленді. Сондай-ақ жоғалған бірінші қажеттіліктегі заттарын сатып алу үшін 150 АЕК-ке дейін қосымша төлемдер берілуде. Бүгінгі таңда 9,9 млрд теңгеге 21 869 отбасы осындай көмек алды, -деп хабарлады primeminister.kz.
Зардап шеккен бизнеске келтірілген залалды өтеу жұмыстары жалғасуда. Өңірлік комиссиялар жалпы сомасы 7,9 млрд теңгеге ШОБ субъектілерінің 455 өтінімін қарап, мақұлдады.
СУҒА КЕТКЕН МАЛДЫҢ ӨТЕМАҚЫСЫНА 2,8 МЛРД ТЕҢГЕ ТӨЛЕНДІ
Суға кеткен мал үшін берілген мемлекеттік көмек көлемі 2,8 млрд теңгеден асты.
Қолда бар мәліметке қарағанда, Үкімет елімізде биылғыдай су тасқынын алдын алу үшін шетелдермен бірігіп жұмыс істеуде. Мысалы, Израиль еліміздегі су қоймаларының құрылысына инвестиция салуға ниет білдіріп отыр. Кеше осы мәселеге байланысты су ресурстары және ирригация министрі Нұржан Нұржігітов Израильдің ірі компанияларымен келіссөз жүргізді.
