Мәжіліс депутаты Ермұрат Бапи Премьер-министр Олжас Бектенов пен Бас прокурор Берік Асыловтың атына Қазақстан Республикасының мемлекеттік рәміздерін қорлауға қатысты депутаттық сауал жолдады. Депутат соңғы кездері қоғамда жиілеп кеткен ұлттық құндылықтарға қарсы әрекеттер мен мемлекеттік рәміздерді қорлау оқиғаларын өткір сынға алды, деп хабарлайды Ulysmedia.kz.
“Домбыра – харам”, сәукеле киіп, жартылай жалаңаш би, ал енді – Көк тудың қорлануы…
Бапи өз сауалында ұлттық дәстүрлер мен мәдениетке қарсы бағытталған оқиғаларды тізіп көрсетті. Ол былтыр “Домбыра – харам” деген мәлімдеме жасаған жат ағым өкілдерін, киіз үй ішінде сәукеле киіп, арсыз әрекет жасағандарды мысалға келтіре отырып, бұл үрдістің жалғасы ретінде Атыраудағы мемлекеттік туды қорлау оқиғасын ерекше атап өтті.
Жуырда Атырауда мұз айдынында өткен жарыста бет-аузын тұмшалаған төрт әйелдің Қазақстан Республикасының Туын ұстап түскен суреті желіде кең тараған болатын. Тудың бетіне арабша жазу мен қылыштың суреті бейнеленген. Бұл жазудың сапасы мен дайындалу тәсілі — арнайы құралмен басылып шыққанын көрсетеді. Депутаттың пікірінше, бұл жай ғана қателік немесе тұрмыстық бұзақылық емес, бұл — мемлекеттігімізге, ұлттық бірегейлігімізге қарсы жасалған әдейі арандатушылық.
“Мемлекеттік туды қорлау — тұтас ұлтты қорлау!”
Бапи бұл оқиғаның артында радикалды күштер тұруы мүмкін екенін алға тартып, құқық қорғау органдарын тергеуді тереңдетіп, оқиғаны ұйымдастырған нақты тұлғаларды жауапқа тартуға шақырды.
Сонымен қатар, депутат Wildberries Russ маркетплейсінде стандартқа сай келмейтін тулардың еркін сатылуы — бөлек алаңдаушылық тудыруы тиіс деп санайды. «Бұған кім жол беріп отыр? Бұл не сұмдық?» — дейді халық қалаулысы.
Ұлттық бірегейлік пен зайырлы қоғам арасындағы тепе-теңдік
- Сауалда Қазақстанның зайырлы мемлекет екені, әр азаматтың діни сеніміне құрметпен қаралатыны айтылғанымен, діни көзқарас желеу болып, ұлттық дәстүр мен бірлікті бұзуға жол берілмеуі керектігі баса көрсетілген. «Бұл — діни сенім емес, бұл — қоғамды екіге жаруға бағытталған қаскөйлік әрекет!» – дейді депутат.
