Алматыда ауа сапасын жақсарту мақсатында ескі көліктерді сатып алу бағдарламасы басталады, деп хабарлайды Ulysmedia.kz.
ТОЛЫҒЫРАҚ
Әр жылы атмосфераға 225 мың тоннадан астам зиянды зат бөлінеді, оның 60 пайызы көліктерден шығады, деп жазады LS. Осыған байланысты қалада төмен деңгейлі шығарындылар аймақтары құрылады. Онда Еuro-0-4 санатындағы көліктердің жүруі ақылы болады. Ал Еuro-5, Еuro-6 көліктері мен электромобильдер үшін жол тегін болады. Бұл аймақтарда тұратын тұрғындарға жеңілдетілген абонемент ұсынылмақ.
АҚША ҚАЙДА ЖҰМСАЛАДЫ
Ақылы жолақыдан түскен қаржы экологиялық бастамаларға және қоғамдық көлікті қолдауға бағытталады. Сонымен қатар ескі көліктерді кезең-кезеңімен сатып алу бағдарламасы енгізілмек.
- Жаңа қаржыландыру есебінен экологиялық талаптарға сай келмейтін ескі көліктерді сатып алу бағдарламасы пайда болады. Бұл шектеулердің әлеуметтік салдарын азайтып, автопаркті тезірек жаңартуға және экологияны жақсартуға мүмкіндік береді, – делінген жарияланымда.
Бағдарламаның нақты басталу уақыты әзірге белгісіз.
ЖОБАНЫ ІСКЕ АСЫРУ
Пилоттық жоба қазан айында басталады деп күтілуде. Әзірге ақы алынбайды, тек көлік ағынын және базалық жылдағы автопарктің құрамын талдау үшін тестілеу жүргізіледі.
