Қазақстандағы Профилактикалық медицина академиясының және Денсаулықты нығайту орталығының президенті, АҚШ Денсаулық сақтау қауымдастығының мүшесі, медицина профессоры Алмаз Шарман аутизм туралы айтты, деп хабарлайды Ulysmedia.kz.
XXI ҒАСЫР ДЕРТІ
Оның айтуынша, XX ғасырда адамзат негізінен созылмалы жұқпалы емес аурулармен күрессе, XXI ғасырда басты қатер – нейродегенеративті дерттер.
– Бұл балалардағы аутизм және қарттардағы Альцгеймер. Яғни бұл – өте үлкен проблема. Одан он бір жыл бұрын мұндай ауқымға жетеді деп ойламаған едім. Бірақ мәселе барған сайын ушығып барады. Қазір ол қауіп төндіретін деңгейге жетті, – деді ол Айгүл Тоқсанбаеваға берген сұқбатында.
ҒЫЛЫМИ ОРТАДАҒЫ ЖАҢА ДЕРЕКТЕР
Профессордың айтуынша, ол мамыр айында Сиэтлде өткен ғалымдардың жыл сайынғы дүниежүзілік конгресіне қатысқан. Бұл жиында зерттеушілер аутизмнің себептері мен таралуы бойынша жаңа деректерді талқылаған.
– Біз тек не болып жатқанын қадағалаймыз. Қазір белгілі болғаны – аутизммен байланысты 235 ген анықталды. Бұл белгілі бір деңгейде генетикалық тұрғыда детерминацияланған ауру. Бірақ бұл міндетті түрде анадан немесе әкеден беріледі дегенді білдірмейді. Денова деп аталатын гендер бар. Олар экологиялық факторлардан немесе басқа себептерден пайда болуы мүмкін. Сол гендердің каскады балаларда аутизм спектрі бұзылыстарына алып келуі ықтимал, – деп түсіндірді Шарман.
ДИАГНОСТИКАДАҒЫ ҚИЫНДЫҚТАР
Қазір дүниежүзінде әрбір 100 баланың бірі аутизм спектрі бұзылыстарымен дүниеге келеді. АҚШ-та түрлі деректер бойынша әрбір 31–44 баланың бірінде, ал Оңтүстік Кореяда әрбір 38 баланың бірінде аутизм диагнозы қойылған.
Ғалымның айтуынша, аутизмді нақты анықтау қиын, өйткені ол әр балада әртүрлі формада көрінеді.
– Сіздер келтірген статистика дұрыс, бірақ ол әлі верификацияланбаған, себебі нақты қою өте қиын. Өйткені бұл спектр. Бір балада айқын аутизм байқалса, екіншісінде белгілері жеңіл болуы мүмкін. Сиэтлдегі конференцияда алғаш рет «терең аутизм» деген термин қолайлы деп танылды, – деді профессор.
