Ұлттық экономика министрлігі ойын бизнесіне салынатын салықты арттыруды ұсынды, деп хабарлайды Ulysmedia.kz.
Бұл туралы Сенатта өткен Салық кодексіне арналған Үкімет сағатында ведомство басшысы Әлібек Қуантыров мәлім етті.
«Елімізде азық-түлік тауарларын өндіру және қайта өңдеу үшін ҚҚС салудың тиімді жағдайлар жасалған. Сондай-ақ бөлшек саудагерлер бөлшек салық режимін қолданады, онда ҚҚС-тан босату да қарастырылған. Бұл жеңілдіктер сақталады», - деді министр.
Сондай-ақ, министрлік кейбір салалар үшін корпоративтік табыс салығы мөлшерлемесін арттыруды ұсынды.
«Шикізат және қаржы секторлары, сондай-ақ ойын бизнесі салалары үшін КТС мөлшерлемесін 25-30%-ға дейін арттыру ұсынылады. Сондай-ақ шығындарды ауыстыру мерзімдерін және талап қою ескіру мерзімін 5 жылға дейін теңестіру мәселесі бойынша жұмыс жүргізіліп жатыр», - деді Қуантыров.
Айта кетейік, бұдан бұрын Ұлттық экономика министрі ведомство қазақстандықтардың депозиттеріне қосымша салық салу жоспарынан бас тартқанын мәлімдеді.
Сондай-ақ, елімізде несиеге сатып алынған қымбат мүліктерге де байлық салығы салынатынын айтты.
