Премьер-министр Әлихан Смайылов журналистердің "АрселорМиттал Теміртауды" мемлекет меншігіне беру жөніндегі мәмілеге қатысты сұрақтарына жауап берді, деп хабарлайды Ulysmedia.kz.
Журналистер премьерден шенеуніктердің қайсысы жазаланатынын және инвестор мен бұрынғы президент Назарбаевты жауапқа тарту мәселесі жөнінде сұрады.
"1996 жылы меншік құқығы "АМТ"-ға берілді. Тағы да қайталайын, өте қиын кезең болды, экономикалық құлдырау мен үлкен инфляция болды, өндіріс деңгейі төмендеді, жалақы уақтылы төленбеді. Ел үшін өте қиын уақыт болды.
30 мыңнан астам адам жұмыс істеген өндірісті сақтау маңызды міндет болды. Сондықтан болар, осындай шешім қабылданды.
Кінәлілерге келетін болсақ, тергеу жүргізілуде. Барлық кінәлілер жауапқа тартылады. 2023 жылдың тамызында бес шахтер қаза тапты, қазір тергеу жүріп жатыр, аяқталу сатысында, – деді Смайылов.
Үкімет басшысы Костенко шахтасындағы апатқа қатысты тергеу аясында шенеуніктерден де жауап алынатынын жеткізді.
“Үкімет өзінің жауапкершілігін де түсінеді. Қаза тапқандардың отбасыларына әріптестеріміздің атынан тағы да көңіл айтқым келеді. Біздің міндетіміз – жақын арада компанияны Қазақстанға қайтаруды қамтамасыз ету. Тұрақты жұмысты қамтамасыз ету және барлық әлеуметтік міндеттемелерді орындау", - деді ол.
Сондай-ақ, Смайылов компанияны мемлекет меншігіне беру процесіне қатысты түсініктеме берді.
"Компанияны беру туралы алдын ала келісімге сәйкес, біз қазір егжей-тегжейлерді жариялай алмаймыз. Олар мәміле аяқталғаннан кейін айтылады. Бұл жарты айға созылады. Біз компанияны мемлекетке тапсыру рәсімдерін 30 қарашаға дейін аяқтауымыз керек.
Мемлекеттің меншік иесі болу және ақша салу жоспарларына келетін болсақ. Мұндай жоспарлар жоқ. Біз алдағы үш жылда кем дегенде 3 миллиард доллар салуы керек жеке инвесторды тартуымыз керек. Бірден миллиардтан астам қаражат салуға тура келеді. Қазіргі жағдай проблемаларды тез арада шешуді талап етеді", - деді премьер.
Еске салайық, 28 қазанға қараған түні «АрселорМиттал Теміртау» кенішінде жарылыс болды. Жарылыс кезінде шахтада 252 адам болған, 206 кенші жер бетіне шықты, қалғандары жер астында қалып қойды.
Алғашқы екі күнде 45 кеншінің денесі табылды, ал 46-шы жұмысшының тек дене бөлшектері табылғаны белгілі болды.
Қазақстан президенті Тоқаев «АрселорМиттал Теміртаумен» ынтымақтастықты тоқтатуды бұйырды. Қайғылы оқиға бойынша сотқа дейінгі тергеу басталды.
Сондай-ақ, үкіметтің «АрселорМиттал Теміртау» АҚ акционерлерімен алдын ала келісімге келгені және кәсіпорынды Қазақстанның пайдасына меншік құқығына беру жөніндегі мәміленің аяқталып жатқаны хабарланды.
Қарағанды облысына барып, марқұм кеншілердің туыстарымен кездескен Тоқаев 29 қазанды жалпыұлттық аза тұту күні деп жариялады. Сонымен қатар президент «АрселорМиттал Теміртау» біздің тарихымыздағы ең нашар компания екенін атап өтті.
Қайғылы оқиғадан соң Қазақстанда "АрселорМиттал Теміртау" АҚ инвесторы Лакшми Миттал мен басқарушы Палаватху Кришнанды "қызметкерлердің қауіпсіздігін қамтамасыз етудегі қасақана әрекетсіздігі" үшін қылмыстық жауапкершілікке тартуды талап ететін петицияға қол жинау басталды.
Белгілі экономист, 2022 жылы президенттікке үміткер болған Мейрам Қажыкен билік Костенко шахтасындағы апатқа бар кінәні "АрселорМиттал Теміртау" компаниясының акционері Лакшми Митталға жауып отырғанын, ал шын мәнінде кеншілердің өліміне 90% үкіметтің өзі кінәлі екенін мәлімдеді. Алайда премьер-министр Әлихан Смайылов үкіметті ақтап, жауапкершілікті кәсіпорын басшылығына ысырды.
