Ақтөбе облысында аудандық білім бөлімінің әдіскері жалған диплом үшін 800 мың теңге беріп, алаяқтың құрбаны болды, деп хабарлайды Ulysmedia.kz.
2023 жылдың көктемінде әдіскер әйел әріптесіне университетке «Педагог-психолог» мамандығына түсу ниеті туралы айтады. Ол болса, қалада магистр дәрежесін алуға «көмектесетін» досы бар екенін жеткізеді. Әйел байланыс нөмірлерін алып, қоңырау шалады. Ер адам диплом «ұйымдастыра» алатынын растап, «қызметтері» үшін 800 мың теңге аванстық төлем сұраған. Мұндай сома болмағандықтан, әйел несие алып, банктік өтініш арқылы ақша аударған. Бірақ уәде етілген диплом да, ақша да жоқ.
Қараша айының соңында жәбірленуші полицияға хабарласқан. Күдікті 41 жастағы Ақтөбе қаласының тұрғыны, бұрын осыған ұқсас қылмыстар үшін сотталған. Қазақстан Республикасының Қылмыстық кодексіне сәйкес, алаяқтық фактісі бойынша іс қозғалған. Алдын ала тергеу амалдары жүргізілуде.
Оралхан ҚОЖАНОВ
