Атырау облыстық сотында Атырау мұнай өңдеу зауытының бұрынғы бас директоры Шухрат Данбайға және кәсіпорынның сатып алу департаментінің бұрынғы директоры Қанат Сейдуалиевке қатысты үкім шығарылды, деп хабарлайды Ulysmedia.kz.
Не үшін айыпталды
АМӨЗ-нің бұрынғы басшысы мен Қанат Сейдуалиев алдын ала сөз байласу арқылы өздерінің қызметтік өкілеттіктерін асыра пайдаланды деп айыпталған болатын.
Тараптардың талабы
Прокурор Данбайға мемлекеттік қызметте қызмет атқару құқығынан өмір бойына айыра отырып, 7 жыл мерзімге бас бостандығын шектеу түріндегі жаза, Сейдуалиевке мемлекеттік қызметте қызмет атқару құқығынан өмір бойына айыра отырып, 6,5 жыл мерзімге бас бостандығын шектеу түріндегі жаза тағайындауды сұрады.
Ал адвокаттар әдеттегідей өздерінің қорғаушыларын ақтауды сұрады.
Сот шешімі
"Қылмыстық құқық бұзушылық жасағаны үшін сотталушылардың кінәсі толық дәлелденді" деген шешім шығарылды.
Нәтижесінде Данбайға 4,5 жылға бас бостандығын шектеу, ал Сейдуалиевке 3,5 жыл бас бостандығын шектеу түріндегі жаза тағайындалды.
Контекст
Тергеу мәліметтері бойынша, Данбай үшінші тарап кәсіпорындарымен жабдықты ауыстыру және жөндеу шарттарына қол қойған. Жабдық жарамсыз болса да, директор ақшаны қайтару шараларын қолданбаған. Келтірілген залал 2,9 млрд теңгені құрады.
2023 жылдың мамырында Данбайға ақтау үкімі шығарылды. Кейінірек Жоғарғы сот оны жою туралы шешім қабылдады, өйткені сот көрсеткен жағдайлар расталмады.
Данбай кім?
Данбай алдымен Павлодарда, содан кейін Атырауда мұнай өңдеу зауыттарының бас директоры болды. Павлодар мұнай-химия зауытында ол 2009 жылдың қыркүйегінен 2017 жылдың қарашасына дейін, АМӨЗ-де – 2019 жылдың ақпанынан 2021 жылдың шілдесіне дейін еңбек етті.
2022 жылдың қазан айында Данбай Павлодардағы қызметі үшін сотталды. Оған 750 млн теңгеден асқан залал үшін және лауазымдық өкілеттіктерін асыра пайдаланғаны үшін 3,5 жылға бас бостандығын шектеу үкімі шығарылды. Сот бұл істі жеделдетілген режимде қарады. Өйткені сотталушымен іс жүргізу келісімі жасалды. Ол кінәсіеһн мойындады және өкінетінін айтты.
