Енді команда басшылығы алаңға қанша легионер шығаратынын өздері шешеді, деп хабарлайды Ulysmedia.kz.
13 отандық ойыншы болуы міндетті
Қазақстан футбол федерациясының басшысы Әділет Барменқұлов легионерлер лимитінің жойылғанын хабарлады. Бұған дейін алаңға жеті шетелдік ойыншыдан артық шыға алмайтын.
Десе де, бір шарт бар. Команда құрамындағы 25 орынның кем дегенде 13-ін қазақстандық футбол тәрбиеленушілері иеленуі тиіс.
Өзгерістің өзегі
"Біз футболды дамытудың негізгі аспектісіне айналатын тірі бәсекелестікке жағдай жасаймыз. Біз жалақыны жасанды көтеруді болдырмайтын нарықтық жалақы жүйесін құрамыз. Үшіншіден, алаңдағы бәсекелестіктің жоғары деңгейі ойын сапасын арттыруды және футболға қызығушылықты арттыруды қамтамасыз етеді. Бұл стадиондарға келушілердің көбеюіне әкеледі. Біз инвесторлардың қызығушылығын тудырамыз, сонда ғана мемлекеттік қаржыландырудан жеке қаржыландыруға алмасу үрдісі жүреді", - деп түсіндірді Барменқұлов.
Қазақстандағы легионерлер
2023 жылға арналған ресми деректер жоқ. Ал 2022 жылғы мәліметтер бойынша, Қазақстан премьер-лигасында 290-нан астам шетелдік ойыншы доп тепкен. Өткен жылдың жазында қазақстандық клубтарға 34 легионер қосылып үлгерген.
Жалақы жайы
Бір жыл бұрын Әділет Барменқұлов сұхбатында Қазақстанның кәсіби клубындағы ойыншының орташа жалақысы екі млн теңгені құрайтынын айтты.
Ал футболшы Абзал Бейсебеков болса, ойыншылардың азаматтығына қарамастан барлық ойыншылар айына орта есеппен төрт миллион теңге алатынын алға тартты.
Сарапшылар пікірі
Сарапшылар лимитті алып тастау мәселесінде түрлі пікір айтады. Кейбіреулер бәсекелестік күшейеді деп санайды. Басқалары жергілікті ойыншылардың нашар дайындығына байланысты легионерлермен бір деңгейде ойнай алмайтындығына сенімді.
