Нобель сыйлығының лауреаты Пол Кругман The New York Times газетінің авторлық бағанында осындай пікір білдірген, деп хабарлайды Ulysmedia.kz.
Экономист тоқыраудың себебін неден көреді?
– Ресми статистика Қытай жапон үлгісіндегі дефляцияны және жастар арасында жұмыссыздықтың жоғары деңгейін бастан өткеріп жатқанын көрсетеді. Бұл, кемінде, әлі толық дағдарыс емес, бірақ Қытай тоқырау мен түңілу дәуіріне аяқ басты деп сенуге негіз бар, - деп жазған Кругман.
Пол Кругманның жазуынша, кейбір экономистер коронавирусқа қарсы шаралар жойылғаннан кейін қытай экономикасының күрт өсімін күткен. Оның орнына Қытай ресми жалпы ішкі өнімнен басқа барлық экономикалық көрсеткіш жағынан артта қалған.
Сарапшының пікірінше, қалыптасқан жағдайдағы жауапкершіліктің бір бөлігі ел басшылығына және жүргізіліп жатқан экономикалық саясаттағы қателіктерге байланысты. Кругман қателіктер санатына жеке бастаманы басып-жаншу,"қаржылық “қуғын-сүргінді”, сондай-ақ отбасыларды төтенше жағдайлар кезінде үнемдеуге мәжбүр ететін әлсіз әлеуметтік қорғау жүйесін жатқызады.
“Қытайдағы ахуалға қуанбайық”
Мұның бәрі, экономистің айтуынша, елдегі тұтынушылық белсенділіктің төмендеуіне әкеледі. Осыған байланысты жеткілікті сұранысты қамтамасыз етіп, сол арқылы өндірістік қуаттарды қолдау үшін мемлекет экономикаға ЖІӨ-нің 40% астамын инвестициялауға мәжбүр. Кругман мұндай схема өнімділіктің тез өсіп келе жатқан жұмыс күшімен өміршең екенін көрсетеді. Бұл ретте Қытай жағдайында еңбекке қабілетті халық саны 2010 жылдан бастап азайып келе жатқанын, ал өнімділік тоқырау сатысында тұрғанын атап өтеді.
Кругман Қытайдың экспортты ұлғайту арқылы өз экономикасын қолдауға тырысуы мүмкін деп тұспалдайды.
– Ең қорқыныштысы, Қытай әскери авантюризммен айналысу арқылы ішкі қиындықтардан назарды аударуға тырыса ма? - деп сұрақ қояды Нобель сыйлығының лауреаты.
Экономист Қытайдағы экономикалық құлдырауға қуанудың қажеті жоқтығын ескертеді. Себебі Қытайдың экономикалық қиындығы бүкіл әлемге кері әсер ететінін айтады.
