Бүгін мәжілісте депутаттар сыбайлас жемқорлыққа қарсы жұмысты жетілдіру бағытында заң жобасын қарады. Әзірге жалпы отырысқа шыға қоймаған құжатты төменгі палата депутаттары алдында сыбайлас жемқорлыққа қарсы іс-қимыл агенттігі төрағасының орынбасары Ұлан Сарқұлов қорғаған. Депутаттар тарапынан Сарқұловты «сергелдеңге салған» сұрақтар да болды, деп хабарлайды Ulysmedia.kz.
Базарбектің ашуы
Сондай сұрақтардың бірін Ұлан Сарқұловқа депутат Бақытжан Базарбек қойды. Оның сөзінше, мыңдаған кәсіпкерді алаңдататын сұрақ – шенеуніктердің қате шешімі үшін жауапкершіліктің жоқтығында. Депутат Қазақстанда мыңдаған адам еңбек ететін ондаған кәсіпорын барын атап өтеді. Әрбір адамның үйінде бес-алты адамнан бар.
– Шенеуніктер қабылдаған қаулылар арқылы біреулерге жерлер берілді. Өндірістік орындар солай ұстағанның қолында кетті. Ал тұрғындар қазір сотқа беріп жатыр. Бұлай кете берсе, елдегі үш-төрт кәсіпорын жабылады. Шенеуніктер қабылдаған шешімі мен шығарған қаулысы үшін жазаланған жоқ. Өкінішке қарай, осы заң жобасында кәсіпкерлер көргісі келген норманы көрмей отырмыз. Мен де көрмедім. Шенеуніктердің қаулысының күшін жойған соттардың шешімдері бар. Бірақ ол шенеуніктер ешқандай жауапкершілікке тартылмайды. Мәселені қалай реттейсіздер деп сұрады, – Базарбек.
«Жұмыс ретімен жүргізіліп жатыр»
Бұл сұраққа жауап берген Сарқұлов депутаттың «эмоционалды сұрағына» алғысын айтып бастап, әр жағдайға жеке тоқталу керектігін айтады.
– Мұндай факттар жоқ демейміз. Расында да, бар. Қордаланып та қалды. Әділетсіздіктер де көп болды. Дойнг бизнес тағы басқасы бар... Солар жазасыз сіз айтқандардың іске аса беруіне жол ашты. Төтенше жағдайлар бойынша, эскиздер бойынша ешкім ешкіммен мақұлдаспайтын. Жұмыс комитетінде сізбен осы мәселені талқылаған едік, – дейді ол.
Антикор басшысының орынбасары Алматының таулы бөктерінде заңсыз 54 құрылыс анықталғанын айтады. 35-і бойынша олар мемлекетке қайтарылуы керектігі турасында сот шешімі шыққан. Екі нысан сүрілген. Сарқұлов лауазымды адамдар қылмыстық жауапкершілікке тартылып жатқанын айтады. «Яғни тиісті шаралар қабылданып жатыр, жұмыс бір орында тұрған жоқ» дейді ол.
Депутат сот әкімдердің қаулысын заңсыз деп танығанын еске салды
Десе де антикоршының жауабы депутатты қанағаттандырған жоқ. Бақытжан Базарбек 2021 жылы антикорға Алматының бұрынғы әкімдері Бауыржан Байбек пен Бақытжан Сағынтаевтың үстінен арыз түсіргенін есіне салды. Айтуынша, агенттік екеуінің үстінен де іс қозғамаған.
– Проблема неде сонда? Бізде заң тиісе алмайтын адамдар бар ма? Мұны қалай түсінуге болады? – дейді ол.
Сарқұлов та жауабынан тайған жоқ. Әрбір эпизод жеке қаралатынын айтып, жауабын қайталады. «Құқықтық негіз болу керек» дейді ол. Ал Базарбек сот шешімімен әкімдер заңсыз қаулы шығарғанын еске салды. Базарбектің айтуынша, ауыл немесе аудан деңгейіндегі шенеунік осындай бапты бұзса, сотталып кететінін, ал бұл жағдайда заң «таңдаулы сипатқа ие екенін» айтады. Сарқұлов сонда да «бұл дұрыс емес ойлам» деп өз пікірінде қалды.
Еске сала кетейік, мәжіліс депутаты Бақытжан Базарбекке бұған дейін әл-Фараби атындағы Қазақ ұлттық университетінің жері әлі күнге дейін жер қайтарылмағанын хабарлаған еді.
