Қолайсыз ауа райы салдарынан 750-ге жуық жолаушы Алматыдан ұшып кете алмай жатыр. Оңтүстік астанада 5 әуе рейсі тоқтатылып, 60 әуе рейсі кестеден кешігуде, деп хабарлайды Ulysmedia.kz.
Азаматтық авиация комитеті қазіргі уақытта әуежайда ұшу-қону жолағын тазарту жұмыстары жүргізіліп жатқанын хабарлады.
"Ауа-райы жақсарған сайын рейстердің кешігу жағдайы тұрақтанады. Авиакомпания өкілдері жұмыс орнында және жолаушыларға барлық қажетті ақпаратты ұсынады", - деп түсіндірді комитет басшылығы.
Хабарламада кешіктірілген рейстер кейінгі рейстердің тізбекті кешігуіне әкелуі мүмкін делінген.
Кідірістер ұшу қауіпсіздігін қамтамасыз ету мақсатында орын алғаны хабарланды.
