Салтанат Нүкенованы өлтірді деп айыпталған Қазақстанның бұрынғы Ұлттық экономика министрі Қуандық Бишімбаевтың ісі бойынша өтіп жатқан сотта тараптардың жарыссөзі басталды, деп хабарлайды Ulysmedia.kz.
Жарыссөз
Судья жарыссөзде сөз сөйлеудің келесі тәртібін белгіледі: алдымен жарыссөзде сөз айыптаушы тарапқа беріледі, одан кейін жәбірленуші сөз сөйлейді, одан кейін оның өкілдері, одан кейін сотталушылардың қорғаушылары, одан кейін сотталушы Бишімбаев және Байжанов сөз сөйлеуді аяқтайды.
Сот жарыссөздері – тараптар өкілдерінің: айыптаушы, жәбірленуші тарап және айыпталушылардың сөйлеген сөздерінен тұратын сот тергеуінің соңғы кезеңі.
Сот жарыссөзі аяқталғаннан кейін сот шешім қабылдау үшін кеңесу бөлмесіне кетеді.
Бишімбаевтың соты
Басты сот 1 сәуірде басталды.
Бишімбаевқа Қылмыстық кодекстің 110-бабының 2-бөлігінің 1-тармағы (Азаптау), 99-бабының 2-бөлігінің 5-тармағы (Аса қатыгездікпен жасалған кісі өлтіру), 14-бабының 2-бөлігі (Аса ауыр қылмыстың қайталануы) бойынша айып тағылуда. Ол өз кінәсін мойындамайды.
Аумағында кісі өлтіру орын алған астаналық Гастроцентрдің директоры Бишімбаевтың туысы Бақытжан Байжанов аса ауыр қылмысты жасырды (ҚК 432-бабы) және ауыр қылмыс туралы хабарламады (ҚК 434-бабы) үшін айыпталуда.
