Түркістан облысының полиция департаменті Сарыағаш ауданында жоғалып, денесі табылған баланың оқиғасы бойынша мән-жайды хабарлады, деп жазады Ulysmedia.kz.
Полиция не дейді
Полиция қызметкерлері Сарыағаш ауданындағы жоғалған қыздың денесін тапқан. Полиция департаменті криминалдық полиция басқармасы мен Сарыағаш аудандық полиция бөлімі қызметкерлерінің жедел-іздестіру іс-шаралары барысында, жоғалған кішкентай қыздың зорлық-зомбылықпен өлім белгілері жоқ денесі көрші үйдің дәретханасынан табылған.
Қазіргі уақытта сот-медициналық сараптамасы тағайындалып отыр.
- Қыздың денесінен қандай да бір жарақаттар анықталмаған. Болған оқиғаның толық мән-жайы анықталуда. Полиция азаматтарды тек ресми дереккөздерге сенуге және жалған ақпарат таратудан бас тартуға шақырады, – делінген хабарламада.
Үш күн бұрын жоғалған
Еске сала кетейік, жергілікті тұрғын үш жасар қызының жоғалып кеткені туралы полицияға хабарласқан болатын. Оны іздеуге полиция қызметкерлері, төтеншеліктер, әкімдік өкілдері, құтқарушылар, еріктілер және бей-жай қарамайтын барлық тұрғындар жұмылдырылды.
