Биыл Арапа күні 15 маусымға келіп тұр. Құрбан айттың алдындағы күн және күндердің ең қадірлісі. Бұл күні жасалған ізгі амалдардың сауабы бірнеше еселеніп беріледі.
Арапа араб тіліндегі білу, түсіну деген мағынаға саятын «ъарафа» етістігінен шыққан. Бұл күннің «арапа» деп аталуының себебі, зүл-хижжа айының сегізі күні Ибраһим пайғамбар түсінде құрбандыққа баласын Исмайылды шалу жайында түс көреді. Алғашқыда көрген түсін «жай түс пе әлде аян ба» деп ойлаған Ол ертесіне (айдың тоғызына) тағы көреді. Осыдан кейін оның Алладан келген аян екенін біледі. Осы себепті бұл күнді «арафа (арапа)» деп атап кеткен деседі.
Арафа күні қажылыққа бармаған кісінің ораза ұстап, нәпіл намаздар оқып, Алладан дұға тілеуі сауапты. Өйткені Сахих Муслимде риуаят етілген бір хадисте ардақты Пайғамбарымыз (с.а.у): «...Арапа күнгі ораза үшін өткен жылғы және келер жылғы (екі жылдық кіші) күнәларын кешіруді Алладан үмітпен тілеймін...» - деп бұл күнгі оразаның маңыздылғын баса айтқан.
Тағы бір хадисінде: «Дұғалардың ең қайырлысы - Арапа күні жасалған дұға...» - деген.
Біздің елде Арапа күні осы күннің ертеңінде басталатын Құрбан айт мейрамына шелпек-бауырсақ пісіріп, дастархан әзірлігі жасалып жатады. Сонымен қоса, бір күн ораза ұстаған да дұрыс болады.
Арапа күні ораза тұту – сүннет. Ардақты Пайғамбарымыз Мұхаммед (оған Алланың салауаты мен сәлемі болсын): "Арапа күні ораза ұстау арқылы Алладан өткен және келесі жылдың күнәсін кешіруді үміт етемін", – деген.
Осыдан-ақ бұл оразаның артықшылығын көруге болады. Яғни, жылына бір рет келетін Арапа күнін оразамен өткізу – Алла Тағаланың кешіріміне бөленуге берілген мүмкіндік.
