Қылмыстық-атқару жүйесі комитетінің мәліметі бойынша, Салтанат Нүкенованы өлтіргені үшін сотталған Қуандық Бішімбаевты колонияға жіберді, деп хабарлайды Ulysmedia.kz.
ҚАЖК Қуандық Бишімбаев сот үкіміне сәйкес барынша қатаң режимдегі мекемеге жіберілгенін хабарлады.
"Сонымен қатар, Қылмыстық-атқару кодексінің 88-бабына сәйкес, сотталғандар жазасын өтеу орнына бекітілген мекемеге жіберіледі", - делінген хабарламада.
“За нами уже выехали” Телеграм-арнасы оның Астанаға жақын маңдағы, Ақмола облысындағы Аршалы колониясына жіберілгенін хабарлады.
БИШІМБАЕВ ІСІ
Еске сала кетсек, 13 мамырда Астанада әйелін аса қатігездікпен қинап өлтірді деп айыпталған экс-министр Қуандық Бишімбаевқа сот үкімі шыққан еді. Астана қаласындағы қылмыстық істер жөніндегі мамандандырылған ауданаралық сотында әйелін аса қатігездікпен өлтірді деп айыпталған экс-министр Қуандық Бишімбаев 24 жылға сотталды.
Астанадағы "Гастро-орталық" директоры, Бишімбаевтың туысы Бақытжан Байжанов Салтанат Нүкенованың өліміне байланысты іс бойынша "қылмысты жасырды" деген күдікпен сотқа тартылған. Сот үкімімен ол 4 жылға бас бостандығынан айырылды.
