Қостанай облысының полиция департаменті бес жастағы қыз баланың зорланғанын растады, деп хабарлайды Ulysmedia.kz.
Полиция не дейді
– Кәмелетке толмағандарға қатысты жыныстық сипаттағы іс-әрекеттер фактісі бойынша сотқа дейінгі тергеу басталды. Сотқа дейінгі тергеу барысында үш бала анықталды. Күдіктілер қылмыстық жауапкершілікке тартылатын жасқа жетпеуіне байланысты оларға бұлтартпау шарасы қолданылған жоқ. Іс бойынша барлық қажетті тергеу әрекеттері жүргізіледі. Тиісті сараптамалар тағайындалды, олардың нәтижелері бойынша тиісті процестік шешім қабылданады, – делінген полицияның Ulysmedia.kz порталына берген мәліметінде.
Заң талаптарына сүйеніп, полиция оқиға бойынша бұдан басқа ақпаратты бермеді.
Оқиға жайлы
Еске сала кетейік, Қостанайда 12-13 жастағы ұлдар 5 жасар қызды зорлағаны жөнінде алғаш ақпаратты #НеМолчиKZ ұйымы таратқан еді. Оқиға 6 шілде күні болған. Анасы қызына велосипед сатып алып, тосынсый жасайды. Көршісі екеуі велосипедті жинап жатқанда, таныс көршінің баласы қызды үйдің артына алып кетеді. Анасы қызының сыртқа шығып кеткенін байқап, іздей бастайды. Кейіннен үсті-басы кір-кір, шашы дода-дода, ойыншық салынған қабын сүйретіп келе жатқан қызын көреді. Қатты қорқып кеткен анасы не болғанын түсінбей, қызына ұрысып тастайды. Алайда бұл әрекеті үшін кейіннен ол қатты өкінген.
Қыз тұйықталып, бірден болған оқиға туралы айтпаған. Барлық шындық 20 шілде күні анықталды. Қыз атасына басынан өткен жағдайды түгел айтып береді. Осыдан кейін полицияға арыз берілді. Белгілі болғандай, қызды алыс жерге апарып, сексуалдық сипаттағы зорлық-зомбылық әрекеттерін жасаған. Қарсыласқан және айқайлаған балаға екі бала күш қолданып, таспен самайынан ұрған. Осылайша қыз жантүршігерлік әрекеттердің құрбаны болды, - делінген хабарламада.
Агрессорлардың ата-аналары, яғни жасы 8, 12 және 13-тегі ұлдардың ата-аналары, жағдайдың қаншалықты ауыр екенін түсінеді. Полицейлер бірқатар сараптамалар тағайындап, жауап алды. Балалар кінәсін мойындап, тергеуге мемлекеттік адвокат пен мектеп психологы тартылды.
