Орал әкімдігінің қызметкері өзінің жұбайы, Әділет департаментінің қызметкеріне жаңа үйден қызметтік пәтер берген, деп хабарлайды Ulysmedia.kz.
Осыған байланысты қызметтік тексеру барысында Орал қаласы әкімі аппаратының бірыңғай мемлекеттік-құқықтық бөлімінің басшысы лауазымын атқаратын А.Мыңжасаровтың өз ережесін пайдалана отырып, некеде тұрған А. Қарасаеваға пәтер бергенін көрсететін фактілер расталғанын хабарлаймыз, - делінген әкімдік таратқан ақпаратта.
БҚО әкімдігі жоғарыда аталған заң бұзушылықты биыл 28 маусымда облыс әкімінің өкімімен құрылған жұмыс тобы анықтағанын атап өтті. Жұмыс тобының қорытындысы лауазымды тұлғаның іс-әрекетіне тиісті құқықтық баға беру үшін Орал прокуратурасына жіберілді.
Сонымен қатар, қазіргі уақытта облыс әкімінің тапсырмасы бойынша осындай фактілерді анықтау және болдырмау үшін Орал әкімдігі мемлекеттік тұрғын үй қорынан тұрғын үй берудің заңдылығын тексеру бойынша жұмыс тобы құрылды, - делінген әкімдіктің баспасөз хабарламасында.
Әкімдік "сыбайлас жемқорлыққа қарсы іс-қимыл туралы" Қазақстан Республикасы Заңының 15-бабына сәйкес жауапты мемлекеттік лауазымды атқаратын адамдарға, мемлекеттік функцияларды орындауға уәкілеттік берілген адамдарға, оларға теңестірілген адамдарға, лауазымды адамдарға, егер мүдделер қақтығысы болса, лауазымдық міндеттерді жүзеге асыруға тыйым салынатынын еске салды.
