Аудиторлар ҚазМұнайГаз бен Бәйтерек компаниясын тексере бастады

Жоғары аудиторлық палата "ҚазМұнайГаз "ҰК" АҚ және оның жекелеген еншілес ұйымдарының активтерін пайдалану тиімділігіне аудит жүргізуді бастады, – делінген хабарламада.

Сондай-ақ "Бәйтерек "ҰБХ" АҚ және оның еншілес ұйымдарына, атап айтқанда:

• "Қазақстан Даму Банкі" АҚ;
• "Qazaqstan Investment Corporation" АҚ;
• "Отбасы банк" тұрғын үй құрылыс жинақ банкі" АҚ;
• "Аграрлық несие корпорациясы" АҚ-да қарызды басқару тиімділігіне аудит басталды.

Еске салсақ, бұған дейін Жоғары аудиторлық палата Назарбаев Зияткерлік мектептері мен Қазақстанның төрт облысына бөлінетін бюджетті, сондай-ақ әлеуметтік-медициналық сақтандыру жүйесін, салық және кеден жүйелерінің тиімділігін тексерген болатын.

Сондай-ақ Жоғарғы аудиторлық палата төрағасы Әлихан Смайлов Мемлекет басшысына биыл екінші жартыжылдықта жүргізілетін аудиторлық іс-шаралар туралы баяндаған еді. Тексеру жұмыстары Назарбаев Университеті және «ҚазМұнайГаз» ҰК» АҚ қызметін, сот жүйесін, сондай-ақ ауыл шаруашылығындағы, өңдеу өнеркәсібіндегі және құрылыстағы жекелеген бағыттарды қамтитынын айтқан.