Әлеуметтік желіде алматылық тұрғын қалада алаяқтықтың жаңа түрі пайда болғаны туралы ескерту видеосын жариялаған. Оның айтуынша, көшеде қара жәшік ұсынатын қыздардан сақ болған жөн, деп хабарлайды Ulysmedia.kz.
40 МЫҢ ТЕҢГЕ ТӨЛЕСЕҢ...
Тұрғынның айтуынша, оқиға “Арбат” жақта қызы мен құрбысымен қыдырып жүрген кезінде болған.
Сол жерде жанымызға бізге жасы 18-19 шамасында қолында қара жәшігі бар бір қыз келді. Қандай да бір эксперимент туралы айтты. Егер біз оған 40 мың теңге төлесек, осы жәшіктің бәрін бізге беретінін айтты. Ол жәшікте “Apple” компаниясының өнімдері бар екенін айтты. Құлаққап, сағат, болмаса планшет болуы мүмкін екенін жеткізді. Осылайша бұл 40 мың теңге түгелдей ақталатынын алға тартты. Мен бұл күмәнді ұсыныстан бас тарттым. Алайда құрбым тәуекел еткісі келетінін айтты. Оған жәшік ішінде не бар екені қызық болды. Ол 40 мың теңгені жаңағы қызға аударып жіберді, – деді тұрғын.
ЖАСАНДЫ ҚҰРЫЛҒЫЛАР
Осылайша, кейін жәшікті ашқанында оның ішінен AirPods құлаққабының 3 буыны, Вunker ойыны, жалғаушы сымдар мен қытайлық қуаттағыш құрылғы болған.
Мен AirPods-ты сайт арқылы тексеру керек екенін айттым. Құрбым сыртындағы жапсырмасы арқылы қарап еді, сайт түпнұсқа екенін көрсетті. Кейін біз ЦУМ сауда орталығына бардық. Онда құлаққапты көрсетіп, сатсақ қанша тұратынын сұрадық. Ал олар бізге мұның жасанды құрылғы екенін, 6-7 мың теңге тұратынын айтты. Кейін құрбым OLX қолданбасына кіріп бағасын көргісі келді. Онда мұндай жалған түпнұсқалық жапсырмалары бар жасанды құрылғылар өте көп екен. Және олардың бағасы 65-70 мың теңгеден тұр. Сатылымда тұрғандардың кодтарының бәрі бірдей , бәріне бір жалған жапсырманы қолданған, – деп қосты ол.
ЖАЛҒАН, АЛДАУ
Тұрғын алматылықтарды сақ болуға шақырды.
Бәлкім 95 пайыз адам бұл ақпаратты білмеуі мүмкін. Көшедегі мұндай адамдарға сенбеңіздер! Мұның барлығы жалған, алдау. Жап-жас, әдемі қыздардың осылай адамдарды алдап жүргені өкінішті. Өміріндегі алғашқы қадамдарын алаяқтықпен айналысып бастап отыр. 40 мың теңге, әрине, үлкен сомма емес. Бірақ алдау дұрыс емес нәрсе, – деп қорытты ол.
