Сауд Арабиясының энергетика министрі, ханзада Абдельазиз бин Салман, OPEC+ елдері мұнай өндіруді шектеу туралы келісімді бұза берсе, мұнай бағасы барреліне 50 долларға дейін құлдырауы мүмкін екенін ескертті, деп хабарлайды Ulysmedia.kz.
THE WALL STREET JOURNAL ХАБАРЛАДЫ
Бұл туралы The Wall Street Journal басылымы телефон конференциясына қатысқан делегаттарға сілтеме жасай отырып хабарлады.
Министрдің мәлімдемесі жасырын қауіп ретінде қабылданды: Сауд Арабиясы альянс мүшелері квоталарды сақтамаса, баға соғысын бастауы мүмкін. Ханзада әсіресе Ирак пен Қазақстанды атап өтті, олар үнемі келісілген шектеулерден асып кетеді. Тамыз айында Ирак өз квотасын тәулігіне 400 мың баррельге арттырса, Қазақстан Теңіз кен орнының қалпына келтірілуіне байланысты мұнай өндіруді көбейтуді жоспарлап отыр.
Бұл мәлімдемелерден кейін OPEC+ негізгі мүшелері желтоқсандағы онлайн-кездесуде өндірісті шектеуге қатысты ықтимал өзгерістерді талқылауды жоспарлап отыр. Сауд Арабиясы келісімдерді сақтауды талап етуде, өндірістің ұлғаюы нарықтың артық толуына және бағаның құлдырауына әкелуі мүмкін екенін баса айтты.
ТАЯУ ШЫҒЫСТАҒЫ ЖАҒДАЙ
Жағдайды Таяу Шығыстағы геосаяси шиеленістің күшеюі одан әрі қиындатады. Сейсенбі күні Иран Израильге зымырандар атқаннан кейін Brent маркалы мұнай бағасы күрт көтеріліп, халықаралық эталон 5%-ға қымбаттады. Дегенмен, кейін оның бағасы алдыңғы мәндерден 2,4%-ға жоғары деңгейде тұрақтап, бір баррель үшін 70 долларға жуықтады.
Батыс елдері аймақтағы қақтығыстың ушығуы Парсы шығанағынан экспортталатын мұнайдың Ормуз бұғазы арқылы жеткізілуіне кедергі келтіруі мүмкін деп қауіптенуде. Дегенмен, бірнеше ай бойы жалғасып келе жатқан шиеленіс әлемдік бағаларға айтарлықтай әсер еткен жоқ, бұл Эр-Риядтың наразылығын тудырып отыр.
Өз сөзінде ханзада Абдельазиз OPEC+ серіктестерін тәртіп пен келісімдерді сақтауға шақырды.
ЭНЕРГЕТИКА МИНИСТРЛІГІ БЫЛАЙ ДЕДІ
Ал Қазақстанның Энергетика министрлігі ОПЕК+ алдындағы міндеттемелерін орындағанын жазды.
“Ирак, Қазақстан және Ресей қыркүйекте ұсынылған өтемақы жоспарларына сәйкес өз міндеттемелерін толығымен орындағанын растады. Үш ел де келісімнің қалған мерзімі ішінде міндеттемелер мен өтемақыларды орындауды жалғастыратынын мәлімдеді”,- деп жазды ресми мәлімдемеде.
Келесі комитет отырысы 2024 жылдың 1 желтоқсанына жоспарланған.
