Балабақшадағы биометрия және зауыттан шыққан шу: жаңа екі петиция жарияланды

ЕКІ ПЕТИЦИЯ ЖАРИЯЛАНДЫ

Қазақстандықтарға epetition.kz платформасында қол қою үшін тағы екі жаңа петиция қолжетімді. Ресми интернет-ресурста ұсынылған петициялар төмендегілерге қатысты:

• Мектепке дейінгі ұйымдарда балалардың биометриялық аутентификациясын (FaceID) енгізуді тоқтату
• Нобель" фармацевтикалық зауытынан шығатын шуды жою

БАЛАБАҚШАДАҒЫ БИОМЕТРИЯ

Балабақшалардағы биометрияға қарсы петицияны ата-аналар ұсынған. Олардың айтуынша, Қызылорда, Алматы, Атырау, Жамбыл облыстарындағы әкімдіктер балабақшаларда жеке мәліметтер туралы заңның 8-бабын бұзуда. Ата-аналар балалардың фотосуреттері арнайы платформаға тиісті бақылаусыз жіберіледі деп санайды.

«Бұл балалардың қауіпсіздігіне қауіп төндіріп, үшінші тұлғалардың немесе киберқылмыскерлердің биометриялық деректерге заңсыз қол жеткізу мүмкіндігін туғызады, олар алынған деректерді қылмыстық мақсатта пайдалануы мүмкін. Балабақшаларда балалардың биометриялық деректерін жинау барысында арнайы органдардың қызметкерлері, сыбайлас жемқорлыққа қарсы қызмет, әскери қызметшілер мен прокуратура қызметкерлерінің балалары, мүмкіндігі шектеулі балалар, ерекше білім беру қажеттілігі бар балалардың деректері WhatsApp арқылы жіберіледі», делінген өтініште.

ЗАУЫТТАН ШЫҚҚАН ШУ

Ал шуға қатысты петицияны Алматыдағы «Нобель» зауытының маңында орналасқан тұрғын үй кешендерінің тұрғындары шығарған. Олар кәсіпорын басшылығы санитарлық нормаларды, әсіресе өндірістен шығатын шудың деңгейін бұзып отырғанын айтты.

«Өз бақылауларымыз бен өлшеулеріміздің нәтижесінде зауыттан шығатын шудың деңгейі тұрғын үй терезелері деңгейінде 60-70 децибелге жететінін байқадық, әсіресе түнгі уақытта және демалыс күндері, бұл тұрғын үй аймақтарына арналған рұқсат етілген нормадан әлдеқайда жоғары. Бұл тұрғындарға айтарлықтай жайсыздық тудырып, денсаулыққа теріс әсер етеді. Біз ұйқының бұзылуына, ашуланшақтыққа және басқа да күйзеліс жағдайларына әкелетін тұрақты шуға төзуге мәжбүрміз», – деді жергілікті тұрғындар.

Олар мұндай шу созылмалы ауруларға әкелуі мүмкін екенін растайтын ғылыми зерттеулерге сілтеме жасады. 

ТҰРҒЫНДАРДЫҢ ТАЛАБЫ

Тұрғындар келесіні талап етті:

• зауыт шығаратын шудың деңгейіне тәуелсіз тексеру жүргізу;
• шудың деңгейін төмендету;
• өндіріс қуаттарын тұрғын үй кешендерінен алыс аумаққа көшіру мүмкіндігін қарастыру;
• тексеру нәтижелері мен анықталған бұзушылықтарды жою жоспарларын тұрғындарға ашық түрде ұсыну.