Украина президенті Владимир Зеленский сәрсенбі күні, 16 қазанда, Жоғарғы Радада «жеңіс жоспарын» таныстырмас бұрын, Солтүстік Кореяның Украинаға қарсы Ресей жағына шығып, агрессивті соғысқа тікелей қатысқаны туралы расталған деректерді жариялады, деп хабарлайды Ulysmedia.kz.
ЖЕҢІС ЖОСПАРЫ
Украина президенті 16 қазанда өз «жеңіс жоспарын» алғаш рет жариялады, ол 5 тармақ пен 3 құпия хаттамадан тұрады. Президенттің айтуынша, Ресейдің агрессивті соғысын аяқтау үшін Украина мен серіктестері жағдайларды бірге өзгертуі керек, осылайша Ресей «бейбітшілікке мәжбүр болады».
Жоғарғы Радада жарияланған "жеңіс жоспары" бес тармақтан тұрады: біріншісі – геосаяси, екіншісі мен үшіншісі – әскери, төртіншісі – экономикалық, бесіншісі – қауіпсіздік, деп хабарлады Украина президенті заң шығарушыларға.
«Бірінші тармақ – НАТО-ға шақыру. Қазір. Бұл серіктестердің Украинаға қауіпсіздік архитектурасындағы орнын қалай көретінін анықтайды», – деді Зеленский.
Жоспардың екінші тармағы – қорғаныс, оған құпия қосымша кіреді. Үшінші тармақ – ресейлік агрессияны тежеу, ол да одақтастарға арналған құпия қосымшаны қамтиды. Бұл тармақтарға Украинаға қажетті қаруды қамтамасыз ету және алыс қашықтыққа ұшатын қаруды пайдалануға рұқсат беру кіреді. Төртінші тармақ – Украинаның стратегиялық-экономикалық әлеуеті, оған да одақтастарға арналған құпия қосымша бар. Бесінші тармақ – соғыстан кейінгі кезеңде Украинаны қалпына келтіруге арналған.
СОЛТҮСТІК КОРЕЯНЫ АЙЫПТАДЫ
Зеленский Солтүстік Кореяның соғысқа араласуын айыптады.
“Путин басқаратын "қылмыскерлер коалициясына" енді Ким отбасы басқаратын Солтүстік Корея қосылды, олар 20 миллион корейлікті кепілдікте ұстап отыр. Біздің барлауымыз тек КХДР-дың Ресейге қару-жарақ беруін ғана емес, адамдарды да жіберіп жатқанын тіркеп отыр, – деді Зеленский.
Сондай-ақ Путинге Иран режимінің тікелей көмегі жалғасып жатқанын айтты. Украина президенті Ресейдің Қытаймен ынтымақтастығы да жалғасып жатқанын жеткізді.
«Мәлімдемелерге қарамастан, Бейжің БҰҰ Жарғысын бұзып, Путиннің агрессиясын тоқтату үшін нақты қадамдар жасаудан бас тартып отыр», – деді Зеленский.
The Times газеті Украина Қорғаныс министрлігі Бас барлау басқармасының басшысы Кирилл Буданов қыркүйек айында Ресей соғыста Солтүстік Кореядан келген оқ-дәрілер жеткізілімінің арқасында басымдыққа ие болып отырғанын ескерткенін айтты.
