Солтүстік Корея Украинадағы соғыста Ресейді қолдау мақсатында әскер жібергенін НАТО ұйымы сондай-ақ басқа да дереккөздері растады, деп хабарлайды Ulysmedia.kz DW агенттігіне сілтеме жасап.
НАТО РАСТАП ОТЫР
Егер КХДР әскерлері Украинадағы әскери әрекеттерге бағытталған болса, бұл Солтүстік Кореяның Ресей жүргізіп жатқан заңсыз соғысты қолдауының айтарлықтай күшейгенін білдіреді.
"Одақтастар КХДР әскерлерінің Ресейге жіберілгені туралы мәліметтерді растады. Егер бұл әскерлер Украинадағы соғысқа арналған болса, бұл Солтүстік Кореяның Ресей жүргізіп жатқан заңсыз соғысты қолдауының айтарлықтай күшейгенін білдіреді және Ресейдің майдандағы ауыр шығындарының тағы бір дәлелі", – деп мәлімдеді НАТО-ның ресми өкілі Фара Дахлалла.
Ол НАТО-ға мүше елдер бұл мәселе бойынша альянс аясында белсенді консультациялар жүргізіп жатқанын және жағдайды Оңтүстік Корея билігімен талқылауды жоспарлап отырғанын айтты.
АҚШ ДЕРЕКТЕРІ
Сол күні AFP агенттігі Вашингтонның мәліметіне сүйеніп "мыңдаған солтүстіккореялық әскери Ресейде дайындықтан өтіп жатыр" деп хабарлады. АҚШ үкіметі олардың миссиясы қандай болатынын және Украинада соғысатынына қатысты ақпараттың жоқ екенін атап өтті.
"Ресей күн сайын ұрыс алаңында үлкен шығынға ұшырап жатыр", – деп жалғастырды АҚШ өкілі.
Оның айтуынша, егер Мәскеу өз әскерін күшейту үшін Пхеньянға жүгінген болса, "бұл Кремльдің күші емес, үмітсіздігінің белгісі".
АҚШ ҚОРҒАНЫС МИНИСТРІ ДЕ РАСТАДЫ
АҚШ қорғаныс министрі Ллойд Остин де Ресейде солтүстіккореялық әскерилер бар екенін мәлімдеді.
"Бізде солтүстіккореялық әскерилердің Ресейге барғаны туралы дәлелдер бар. Егер олар осы соғысқа Ресей жағына қатысатын болса, бұл өте үлкен мәселе. Бұл тек Еуропаға ғана емес, сонымен бірге Үнді-Тынық мұхиты аймағындағы жағдайға да әсер етеді", – деді ол.
ОҢТҮСТІК КОРЕЯ ДЕРЕКТЕРІ
23 қазанда Оңтүстік Кореяның "Рёнхап" ақпарат агенттігі Ұлттық барлау қызметінің (NIS) бағалауы бойынша Ресейге Украинаға қарсы соғыста қолдау көрсету үшін 3000-ға жуық солтүстіккореялық әскер жіберілгенін хабарлады. Желтоқсан айына дейін Пхеньян бұл мақсатта Ресейге 10 000 әскер жіберуді жоспарлап отыр, деп көрсетілген мақалада.
Әзірге Солтүстік Корея Ресейге әскер жібергенін жоққа шығарып отыр.
