Ыстанбұлдық саясаткер Ахмет Озердің қамауға алынып, қызметінен шеттетілуі оппозицияның ашуын тудырды, деп хабарлайды Ulysmedia.kz.
Билік оны 23 қазанда Анкара маңындағы лаңкестік үшін жауапкершілікті өз мойнына алған Күрдістан жұмысшы партиясына «қатысы бар» деп айыптап отыр.
Еuronews-ның жазуынша, Ыстанбұлда жүздеген адам қалалық аудандардың бірінің мэрінің заңсыз Күрдістан жұмысшы партиясымен байланысы бар деген айыппен тұтқындалып, қызметінен алынуына наразылық білдіру үшін жиналды.
Сәрсенбі күні Ыстанбұлдағы халық тығыз орналасқан Есеньюрт ауданының әкімі, оппозициялық Республикалық халық партиясының мүшесі Ахмет Озерді лаңкестікпен күрес полициясы ұстады.
Бейсенбіде үкімет Озердің орнына Ыстанбұл провинциясының вицепрефектін тағайындады, бұл биліктің Түркияның оңтүстік-шығысындағы күрдтерді қолдайтын мэрлерді ауыстыру тәжірибесін еске түсіріп отыр.
Кемалшылар көшбасшысы Озгюр Озель және басқа да саясаткерлер мұны «төңкеріс» деп атады. Ыстанбұл мэрі Экрем Имамоглу және Ердоғанның әлеуетті бәсекелесі оның одақтасына жасалған шабуыл – биліктің қалаға «бақылауды күшейту» әдісі екенін айтты.
Билік қала әкімдігі алдында шеру өткізуге тыйым салғаннан кейін демонстранттар Ыстанбұлдың батыс шетіндегі Босфор бұғазының Еуропа жағалауындағы Есеньюрт алаңына жиналды.
Кейбіреулер «Біз тағайындалған мэрді емес, сайланған мэрді қалаймыз» деген жазуы бар транспоранттар көтеріп, президент Ердоған үкіметінің отставкаға кетуін талап етті.
64 жастағы Озер – атақты әлеуметтанушы және бұрынғы академик. Наурызда өткен жергілікті сайлауда орталық солшыл Республикалық халық партиясы мен солшыл күрдтерді қолдайтын DEM арасындағы бейресми альянстың арқасында ол Есеньюрт қаласының мэрі болып сайланды.
