Индонезияның Төтенше жағдайлар жөніндегі ұлттық агенттігі дүйсенбі күні қашықтағы Флорес аралында жанартау атқылауынан кем дегенде он адамның қаза тапқанын мәлімдеді, деп хабарлайды Ulysmedia.kz..
МӘН-ЖАЙЫ
Левотоби Лаки-Лаки жанартауы түн ортасына таман атқылай бастаған. Жанартау биіктігі 2000 метрге дейін тығыз ыстық күл шашып, бірнеше ауылға құлаған, соның салдарынан үйлер, соның ішінде католиктік әйелдер монастыры өртеніп кетті. Бұл туралы жанартау бақылау бекетінің қызметкері Фирман Йосеф мәлімдеді, деп жазады Associated Press
Оның айтуынша, жанартау материалдары 6 шақырымға дейінгі аумаққа жетіп, жақын маңдағы қалалар мен ауылдарға тонналаған жанартау сынықтары үйіліп, тұрғындар үйлерін тастап кетуге мәжбүр болған.
10 МЫҢ АДАМҒА ӘСЕР ЕТКЕН
Агенттік өкілі Абдул Мухаридің айтуынша, құлаған үйлердің астында қалған қаза тапқандарды құтқарушылар іздеуде. Барлық табылған мәйіттер, оның ішінде бір бала, жанартау кратерінен 4 шақырым радиуста анықталған.
Мухаридің мәліметінше, атқылау кемінде 10 мың адамға әсер етті. Кейбіреулері туыстарына қоныс аударса, жергілікті билік мектептерді уақытша баспана ретінде дайындап жатыр.
Флорес аралындағы монастырлармен айналысатын Әулие Гавриил қорының басшысы Августа Палма бір монах әйелдің қаза тапқанын, екіншісінің хабар-ошарсыз кеткенін айтты.
«Біздің монах әйелдеріміз тығыз жауған жанартау күлі астында қараңғылықта үреймен сыртқа жүгіріп шықты», – деді Пальма.
Қаңтар айында Левотоби Лаки-Лаки жанартауы атқылағаннан кейін шамамен 6500 адам эвакуацияланған болатын. Үкімет сол кезде аралдағы әуежайды жауып, сейсмикалық белсенділікке байланысты оны әлі ашпады.
Бұл – Индонезияда соңғы екі аптада болған екінші жанартау атқылауы. 27 қазанда елдің ең белсенді жанартауларының бірі – Батыс Суматра провинциясындағы Марапи жанартауы атқылаған еді. Индонезияда 280 миллион адам тұратын аралды елде Левотоби Лаки-Лаки сияқты 120 белсенді жанартау бар.
