Бірнеше қазақстандық компания Ұлыбританияның санкциялар тізіміне енді, деп хабарлайды Ulysmedia.kz.
ТІЗІМДЕ ТАҒЫ ҚАНДАЙ ЕЛДЕР БАР
Бұл туралы Ұлыбритания үкіметінің сайтында жарияланған.
Ресей әскерін тауармен қамтамасыз етуге қатысы бар делінген тізімде Қытай, Түркия, Өзбекстан және Қазақстан, сондай-ақ Ливия компаниялары бар.
ҚАЗАҚСТАНДЫҚ КОМПАНИЯЛАР ТІЗІМІ
STANEX GROUP LIMITED LIABILITY PARTNERSHIP
KAZSTANEX LIMITED LIABILITY PARTNERSHIP
CPS Energy LLP
ZAPCHASTTRADE LLP
TawKZ ЖШС
Rabadaziya LLP
Ұлыбритания үкіметі санкциялар тізіміне енген компаниялар ресейлік әскери-өнеркәсіптік кешен үшін станоктар, микроэлектроника, ұшқышсыз ұшақтардың құрамдас бөліктері, шарикті подшипниктер және басқа да тауарларды жеткізумен айналысқанын мәлімдеді.
Еске салсақ, бұған дейін Қазақстан арқылы Ресейге 1,5 млн доллардың санкциялық тауарлары жеткізілгенін жазған болатынбыз.
САНКЦИЯЛАР
Бұған дейін қазақстандық компания АҚШ-тың жаңа санкциялар тізіміне енген болатын.
"National Endowment for Prosperity" қорының басшысы Үсен Сүлеймен Ресейге батыс санкцияларын айналып өтуге жәрдемдесу айыптары аясында Қазақстан билігінің саясатын қорғап, мәлімдеме жасаған. Дереккөздердің хабарлауынша, 2023 жылы жалған транзиттің арқасында Ресейге ЕО-дан 5 миллиард долларға жуық қосалқы тауарлар жеткізілген. Ресми түрде бұл тауарлар Орталық Азия мен Кавказ елдеріне экспорттауға арналған, бірақ олар Ресейде қалған.
АҚШ Қаржы министрі Джанет Йеллен АҚШ Ресейдің Украинадағы әскери әрекеттерін тежеуге бағытталған жаңа қатаң санкциялар енгізетінін айтты.
Қыркүйек айының басында сауда және интеграция министрі санкциялар тізімінде екі қазақстандық компания барын айтты. Содан кейін АҚШ сауда министрлігі 123 компанияны санкциялық тізімге енгізді, олардың арасында Алматыда тіркелген All Global trading Elektronik dis Ticaret Ltd Sti түрік фирмасының қазақстандық филиалы болды. Бұл компанияның Қырғызстандағы филиалы да санкциялар тізіміне енгізілді.
Қазақстан мен Қырғызстандағы түрік компаниясының филиалдарынан басқа, 64 ресейлік және 42 қытайлық компания, сондай-ақ 8 түрік, 11 ирандық компания және Канада, Кипр, Украина және БАӘ-ден бір субъект санкцияға ұшырады.
2024 жылғы маусымда Еуропалық одақ қазақстандық компанияларға қарсы санкциялар енгізгені хабарланды.
Ресейдің әскери-өнеркәсіптік кешенін қолдауға байланысты тізімде 61 компания болды. Олардың қатарына дрондарға арналған бөлшектерді сатып алумен айналысқан Қазақстан, Қытай, Қырғызстан, Түркия және БАӘ ұйымдары кіреді.
