Әзербайжан астанасында климаттың өзгеруі жөніндегі БҰҰ-ның Негіздемелік конвенциясына мүше тараптардың конференциясының 29-сессиясының (COP29) ашылу рәсімі өтті. Әлемдегі ең маңызды және ауқымды шаралардың бірі болып саналатын бұл конференцияда жаһандық климат мәселелері талқыланады, деп хабарлайды Ulysmedia.kz
COP29 шеңберіндегі жаһандық климат мәселесіне арналған ең жоғары деңгейдегі саммит 2024 жылғы 12-13 қарашада өтеді. Конференцияның басты мақсаты – климаттық өзгерістермен күрес қаржыландыру саласында әділ және өршіл жаңа ұжымдық сандық мақсатқа (NCGQ) қол жеткізу.
САММИТ ТАҚЫРЫПТАРЫ
COP29 төрағалығы климаттық шаралар мен тұрақты даму мақсаттарының өзара байланысы, жасыл энергетикалық аймақтар мен дәліздер, энергияны сақтау, ауыл шаруашылығы, таза сутегі, органикалық қалдықтардан шығатын метанды азайту және жасыл сандық технологиялар секілді тақырыптарды қамтитын 14 бастама ұсынған. Сондай-ақ «Жаңа ұжымдық сандық мақсат» (NCGQ) қаржыландыру жобасы да талқыланатын маңызды мәселелердің бірі ретінде қарастырылады.
ЖАҢА МАҚСАТ
NCGQ климаттық өзгерістермен күреске арналған жыл сайынғы қаржыландыруды көздейді, ол қазіргі міндеттемелердің мерзімі аяқталған соң күшіне енуі тиіс. Климаттық қаржыландырудың бұл жаңа моделі 1,5°C мақсатқа қол жеткізуге ықпал етіп, климаттық шараларды жеделдетуге мүмкіндік береді.
Әзербайжан 2024 жылды «Жасыл әлем жолындағы ынтымақтастық жылы» деп жариялап, 2030 жылға қарай парниктік газдардың шығарылуын 35%-ға, ал 2050 жылға қарай 40%-ға төмендету мақсатын көздеп отыр.
COP29 конференциясы климаттың өзгеруінің әсерлерін азайтуға бағытталған жаһандық күш-жігерде маңызды қадам болып саналады.
