АҚШ-тың жаңадан сайланған президенті Дональд Трамп өзінің кеңесшісі Кэш Пателді Федералдық тергеу бюросының директоры қызметіне тағайындайтынын мәлімдеді, деп хабарлайды Ulysmedia.kz америкалық New York Post басылымына сілтеме жасап.
ТАМАША ЗАҢГЕР
Truth Social әлеуметтік желісіндегі жазбасында Трамп Пателді «Ең алдымен Америка” принципі жолындағы тамаша заңгер, тергеуші және қорғаушы» деп атап, оның жемқорлықпен күресу және әділеттілікті қорғау тәжірибесін атап өтті.
ПАТЕЛ КІМ
Кэш Пател 44 жаста және үнділік иммигранттардың ұлы. Трамптың бірінші әкімшілігінде Пател ұлттық барлау директорының кеңесшісі болды, сонымен қатар Пентагон басшысының аппарат басшысы қызметін атқарды.
Пател сонымен қатар ФБР-дің барлау деректерін жинау өкілеттіктерін шектеу және Трамптың күн тәртібін қолдамайтын бюро қызметкерлерін жұмыстан шығаруды талап ету ұстанымымен танымал. Бұған қоса, ол Демократиялық комитеттің Трамптың Ресеймен болжамды байланыстарына қатысты тергеуін теріске шығаруға белсене қатысқан.
БАР ҮМІТ СЕНАТТА
Енді Пателдің кандидатурасын Сенат қарап, мақұлдауы керек. Егер ол мақұлданса, ол 2017 жылы Трамп он жылдық мерзімге тағайындаған Кристофер Рэйді алмастырып, ФБР басшысы қызметін атқарады.
