Әйелін он жыл бойы бөгде еркектерге зорлатып келген 71 жастағы француз сотталды

МӘН-ЖАЙЫ

Авиньон қаласындағы Воклюз қылмыстық соты 71 жастағы Доминик Пеликоны "ауырлатылған жағдайдағы зорлық-зомбылық" үшін 20 жылға бас бостандығынан айырды, деп жазады France Presse басылымы. Ол бұл мерзімнің үштен екісін өтемей босатылу құқығынан айырылады. Пелико әйеліне транквилизаторлар беріп, оны ер адамдардың топтық зорлауына қатысуға мәжбүрлеген.

Бұл іс бойынша айыпталған 50 адамның ешқайсысы да ақталмады.

– Пелико мырза, сіз Жизель Пеликоға қатысты ауырлатылған жағдайдағы зорлық-зомбылық жасағаныңыз үшін кінәлі деп танылдыңыз, – деп мәлімдеді сот төрағасы Роже Арата.

Ол Доминик Пеликоның он жыл бойы өзінің бұрынғы әйелі Жизельді транквилизаторлармен улап, оны интернет арқылы табылған ондаған ер адамдарға "сексуалдық объект" ретінде бергенін айтты.

Айыптау мәліметтері бойынша, қылмыстар Жизель Пеликоның келісімінсіз, шамамен он жыл бойы олардың Мазан қаласындағы ортақ үйінде жасалған. Бұл шағын қала Францияның оңтүстігінде, Авиньон маңында орналасқан.

АТЫШУЛЫ ІС

2 қыркүйекте басталып, төрт айға созылған бұл сот процесі "Мазандағы зорлау істері" деп аталып, әлем назарын аударды. Бұл оқиға Франция тарихында бұрын-соңды болмаған жантүршігерлік жағдай ретінде есте қалады.

Сот төрағасы Роже Арата 27-ден 74 жасқа дейінгі ер адамдардан құралған 50 айыпталушының әрқайсысына тағайындалған жазаны оқыды. Жазалар үш жыл шартты түрде бас бостандығынан айырудан бастап, 13 жыл түрмеге жабуға дейін өзгеріп отырды. Бұл жаза мерзімдері Франциядағы орташа зорлау жазасынан (2022 жылы 11,1 жыл) ауыр.

Айыпталушылардың адвокаттары клиенттерін ақтауды сұрады. Олар "Доминик Пеликоның манипуляциясына алданып, тек өзара келісім арқылы топтық жыныстық қатынасқа қатыстық деп сенді" деген уәж айтты. Алайда сот бұл дәлелдерді қабылдамады.

Ең аз жаза әйелге "қол тигізу" әрекеті үшін айыпталған адамға берілді.

Сот үкімін тыңдауға Пелико отбасының үш ересек баласы – Давид, Каролина және Флориан қатысты. Олардың аналары, 72 жастағы Жизель, сот залына адвокаттарымен бірге, көпшілік қол шапалақтаған кезде келді. 

Сот процесі кезінде Пеликоның балалары әкесінен бас тартып, оның әрекеттерін ешқашан кешірмейтіндерін мәлімдеді.

Жизель Пелико жаңа тегімен өмір сүруде, бірақ ол құпия сақталуда.