ХАМАС радикалды исламистік қозғалысы алдағы аптада алты тұтқынды босатып, тағы төрт марқұмның денесін Израильге тапсыратынын мәлімдеді. Израиль тарапы бұл ақпаратты растады, деп хабарлайды Ulysmedia.kz.
ХАМАС-тың мәлімдемесіне сәйкес, қаза тапқан тұтқындардың денесі Израильге 20 ақпан, бейсенбі күні беріледі, ал 22 ақпан, сенбі күні қозғалыс тағы алты тірі тұтқынды босатуды жоспарлап отыр. The Jerusalem Post олардың есімдерін жариялады: Омер Венкерт, Элий Коэн, Авраам Менгисто, Таль Шохам, Омер Шем Тов және Хишам әл-Саед. Олардың отбасылары жақындарының осы аптада босатылатыны туралы хабардар етілді.
Бұл алты адамның төртеуі 2023 жылғы 7 қазаннан бері тұтқында болған. Қалған екеуі Газа секторында шамамен 10 жыл бойы тұтқында отырған.
ҚАҚТЫҒЫСТЫҢ ШИЕЛЕНІСУІ
2023 жылғы 7 қазанда Таяу Шығыстағы жағдай күрт шиеленісті. ХАМАС, АҚШ пен Еуроодақ тарапынан террористік ұйым деп танылған қозғалыс, Израильге ауқымды шабуыл жасады. Жаппай зымырандық соққы беріліп, содан кейін содырлар Израиль аумағына басып кіріп, бейбіт халыққа қарсы қанды қырғын ұйымдастырды. Бұл шабуылдан шамамен 1200 адам қаза тапты. Сонымен қатар, ХАМАС 250-ден астам адамды тұтқынға алып, оларды Газа секторына әкеткен болатын. Кейбір тұтқындар босатылды немесе айырбасталды, бірақ біразы қаза тапты.
Жауап ретінде Израиль ХАМАС-қа қарсы соғыс жариялады. Әуе шабуылдары мен құрлықтағы операциялар нәтижесінде Газа секторында шамамен 47 мың палестиналық қаза тауып, 110 мыңнан астамы жарақат алған. Бұл сандар ХАМАС бақылауындағы Палестина денсаулық сақтау министрлігінің деректеріне негізделген. Бірақ олардың нақты қалай есептелгені белгісіз: бұл көрсеткішке әскери содырлар мен табиғи себептермен көз жұмған адамдар кіреді ме, ол туралы ақпарат жоқ.
ХАМАС-ты Ливандық радикалды шииттік «Хезболла» қозғалысы қолдады. Бұл ұйым да Германия, АҚШ, Израиль және кейбір араб елдері тарапынан террористік ұйым деп танылған. «Хезболла» Ливаннан Израиль аумағына зымыранмен шабуыл жасап отыр. Израиль армиясы бұған жауап ретінде оңтүстік Ливанда әскери операция жүргізді, бірақ кейіннен өз күштерін бұл аймақтан шығарды.
