Су азайып барады: Қазақстанға БҰҰ-дан ескерту келді

Кездесуге қатысушылар Қазақстанның су қауіпсіздігіне қатысты алаңдап, елдің су тапшылығы аймағында орналасқанын және шұғыл реформалар жүргізілмесе, бұл жағдай терең дағдарысқа әкелуі мүмкін екенін атап өтті.

БҰҰ-ның Азық-түлік және ауыл шаруашылығы ұйымының (ФАО) мәліметтеріне сәйкес, 2022 жылы Қазақстандағы су ресурстарына түсетін жүктеме деңгейі 34,6%-ға жетті, бұл су тапшылығының айқын көрсеткіші. Сарапшылар суды тиімсіз пайдалану, ирригациялық жүйелердегі жоғалтулардың жоғары болуы және трансшекаралық су ағындарына тәуелділік мәселелерін негізгі қауіп ретінде атады.

Жерасты сулары – балама шешім, бірақ күрделі мәселелер бар

Мәселені шешудің ықтимал жолдарының бірі – жерасты суларының белсенді пайдаланылуы. Алайда олардың қорлары өңірлер бойынша біркелкі бөлінбеген, ал су сапасының төмендігі оны ауыл шаруашылығы мен өнеркәсіпте кеңінен қолдануға шектеу қояды, – деп мәлімдеді ФАО өкілі Виорел Гуцу.

Арал теңізі бассейнінде автоматтандырылған су мониторингін енгізу ұсынылды

Сарапшылар ұсынған маңызды шаралардың бірі – Арал теңізі бассейнінде су ресурстарын басқарудың автоматтандырылған мониторинг жүйесін енгізу. Бұл шешім су ресурстарын тиімді басқаруға және олардың әділ бөлінуін қамтамасыз етуге мүмкіндік береді.

Бірыңғай су есептеу және бақылау жүйесін құру – бұл ұсыныс қана емес, бұл – стратегиялық маңызы бар қажеттілік. Егер біз осы бағытта нақты шараларды қолға алмасақ, алдағы жылдары су дағдарысының салдары апатты болуы мүмкін», – деп атап өтті су ресурстары және ирригация вице-министрі Нұржан Алдамжаров.

Азық-түлік қалдықтарын азайту – су ресурстарын сақтаудың тиімді жолы

Сонымен қатар сарапшылар азық-түлік қалдықтарын басқару тәсілдерін қайта қарау қажеттігін баса айтты. Азық-түліктің шамадан тыс ысырабы тек су тапшылығын тереңдетіп қоймай, сонымен қатар парниктік газдардың бөлінуін ұлғайтады. Сондықтан тамақ қалдықтарын азайту және су пайдалану жүйесін оңтайландыру табиғи ресурстарға түсетін жүктемені айтарлықтай төмендетуі мүмкін.