Ресейде 19 жастағы Қазақстан азаматы Тұран Үстіговке қатысты сот процесі басталды. Ресейдің арнайы қызметтері оны Украина жағында соғысып жатқан қарулы топтарға қосылмақ болды деп айыптайды. Бұл туралы Ulysmedia.kz порталы Азатттық радиосына сілтеме жасап хабарлайды.
19 жастағы Қазақстан азаматы Тұран Үстігов 2024 жылдың күзінде аннексияланған Қырымда ұсталып, содан бері қамауда отыр.
Ресей билігі оны террористік ұйымның қызметіне қатысу және лаңкестік әрекеттерге дайындықтан өту баптары бойынша айыптайды. Егер сот оны кінәлі деп тапса, 20 жылға дейін бас бостандығынан айырылуы мүмкін. Іс Ростов-на-Дону қаласындағы оңтүстік округтік әскери сот қарауында. Алғашқы отырыс 13 наурызға белгіленгенімен, Үстігов сотқа жеткізілмегендіктен өтпей қалды. Жаңа отырыс 20 наурызда өтпек.
Тергеу материалдарына сәйкес, Үстігов Ресей әскеріне қарсы күресетін ерікті батальондардың біріне, соның ішінде «Орыс еріктілер корпусы», «Ресейдің азаттығы» легионы немесе украиналық «Азов» бригадасына қосылуға тырысқан. ФСБ оның телефонынан жалдауға арналған сауалнамалар табылғанын мәлімдесе, құқық қорғаушылар бұл ақпарат арнайы қызметтердің арандатушылық ресурстары арқылы қолдан жасалған болуы мүмкін екенін жоққа шығармайды.
Анасының күресі
Тұранның анасы, Эльмира Жаңабаева, ұлын құтқару үшін бар күшін салып жатыр. Ол қамауға алынған күннен бастап ұлына азық-түлік жіберіп, Мәскеу мен Астанаға хат жазып, адвокатқа қаражат жинап келеді.
Жаңабаеваның айтуынша, ұлы 2024 жылғы 27 қыркүйекте, өзінің 19 жасқа толуына екі апта қалғанда жоғалып кеткен. Кейінірек ол Қырымнан анасына хабарласып, азапталғанын айтқан:
«Анашым, олар мені азаптап, өлтіріп жатыр!» – деп айғайлады ол. Тұранды басын төмен қаратып іліп, тоқпен ұрып-соғып, шекесіне тапанша тақап қорқытқанын айтты, — дейді Эльмира.
Осыдан кейін бір тәулік бойы байланыс үзілген, анасы оның тірі екенін де біле алмаған.
Жаңабаеваның айтуынша, ол ұлын Украинаға барудан қайтаруға тырысқан. Соғыс басталғаннан кейін Тұран жаңалықтарды жіті қадағалап, украиндарға көмектескісі келетінін айта бастаған. Анасы оны психологтарға апарған, мамандар оның интеллектісі жоғары, бірақ психикалық тұрғыдан тұрақсыз екенін айтқан. Ол сондай-ақ Ресейдегі мобилизациядан қашқан қазақстандықтарды Тұранмен сөйлесуге шақырып, оның шешімінің қауіпті екенін түсіндіруге тырысқан.
Бұған қоса, Жаңабаева Қазақстанның Ұлттық қауіпсіздік комитетіне жүгініп, жалдау жүргізілетін Telegram-арналарды бұғаттауды сұраған. Алайда оның айтуынша, нақты шаралар қолданылмаған. Көп ұзамай Тұран Қырғызстан шекарасынан өтіп, бірнеше күннен кейін Мәскеу арқылы Қырымға жеткен.
Қаржылық қиындықтар және шекарадан шығуға тыйым
Эльмира Жаңабаева Қазақстан мен Ресейдің мемлекеттік органдарына көмек сұрап бірнеше рет өтініш жазғанымен, нақты жауап ала алмаған. Жақында оған Ресей президенті әкімшілігінен жауап келіп, Үстіговті Қазақстанға беру мәселесі тек сот үкімі шыққаннан кейін қарастырылатыны айтылған.
Осы уақытта ол күрделі қаржылық қиындықтарға тап болды. Риелторлық агенттіктегі жұмысынан кеткеннен кейін бұрынғы жұмыс берушісі оны келісімді мерзімінен бұрын бұзды деп сотқа беріп, 1,5 миллион теңгеден астам өтемақы төлеуге міндеттеген. Соның салдарынан оның банктік шоттары бұғатталып, өзіне шетелге шығуға тыйым салынды. Бұл оның ұлымен кездесуге баруына кедергі келтіруде.
Соған қарамастан, ол күресін жалғастырып жатыр. Жақында ол Ресейдегі жаңа адвокаттың қызметін төлеу, сондай-ақ ұлына азық-түлік пен киім жіберу үшін тағы да қаражат жинау науқанын бастады.
«Анашым, сен мені осыншалықты жақсы көретініңді білмеппін», — деп жазды Тұран түрмеден жіберген хаттарының бірінде.
Енді оның тағдыры Ресей сотының шешіміне байланысты, ал анасы ұлын үйіне қайтару үшін барын салмақ.
