Ұлттық экономика министрі Серік Жұманғарин Ақорда дәлізінде сән-салтанатқа салықтан бас тарту мәселесіне қатысты пікір білдірді, деп хабарлайды Ulysmedia.kz.
Журналистермен әңгіме барысында Жұманғарин Қазақстанда сән-салтанат салығын енгізу жоспары не себепті өзгергенін түсіндірді. Оның орнына кейбір тауар түрлеріне салықтың жоғарылатылған мөлшерлемесі қарастырылып отыр.
Ол үшін алдымен сән-салтанаттың нақты анықтамасын белгілеу керек. Егер қазіргі ұсыныстарға сүйенсек, солардың өзі сән-салтанатқа жатады. Мысалы, егер жылжымайтын мүлкіңіздің жалпы құны 450 миллион теңгеден асса, онда жыл сайын 3 миллион теңге базалық салық төлейсіз, әрі бұл сомадан асқан әр теңгеден тағы 2% ұсталады. Ал құны 75 миллион теңгеден жоғары көлікке де жоғарылатылған салық салынады. Қымбат алкоголь мен сигарларға да осындай талап қойылады. Бұдан басқа не сән-салтанат деп саналады? Өзім де білмеймін, – деді Жұманғарин.
Айта кетейік, өткен аптада ұлттық экономика вице-министрі Азамат Әмрин Қазақстанда сән-салтанатқа бөлек салық енгізілмейтінін мәлімдеген еді. Кейін министрлік нақтылап, жекелеген тауарларға салық мөлшерлемесінің артатынын хабарлады.
