Шешенстан басшысы Рамзан Қадыров 17 жастағы ұлын жаңа қызметке тағайындады, деп хабарлайды Ulysmedia.kz.
ЛАУАЗЫМДЫ ҚЫЗМЕТ
Шешенстан басшысының ұлы, 17 жастағы Адам Қадыров өңірлік ІІМ-нің кураторы болып тағайындалды. Бұл туралы 31 наурызда өткен жиналыста жария етілді, деп жазады Кавказ.Реалии. Ішкі істер министрі Аслан Ирасхановтың айтуынша, бұл шешім Рамзан Қадыровтың тапсырмасымен қабылданған.
ІІМ ұжымына таныстырылғаннан кейін Адам Қадыров “ерекше көзге түскен” сегіз қызметкерге Шешенстан Батыры медальдарын табыстады.
“ШЕШЕНСТАН БАТЫРЫ”
Адам Қадыров – әкесінің қауіпсіздігін қамтамасыз ететін бөлімнің жетекшісі әрі Шейх Мансур атындағы батальонның кураторы. Оған Шешенстан Батыры атағы берілген және Ресей рекордтар кітабына енген (РФ субъектісі басшысының қауіпсіздік қызметін басқарған ең жас басшы ретінде).
Қадыровтың ұлы Құранды өртеді деп айыпталған Никита Журавельді тергеу изоляторында соққыға жыққаннан кейін түрлі марапаттар және жоғары лауазымдарға тағайындала бастаған. Журавель кейін үш жарым жылға колонияға сотталды. 2024 жылғы 3 қазанда бас прокуратура оған қарсы жаңа қылмыстық іс қозғалғанын хабарлады – бұл жолы мемлекеттік опасыздық бабы бойынша.
ҚАДЫРОВТЫҢ ҚЫЗМЕТТЕГІ БАЛАЛАРЫ
Қадыровтың балалары мен туыстары жиі жоғары қызметтерге тағайындалып отырады. Былтыр Рамзан Қадыровтың тағы бір ұлы Ахмат Шешенстанның спорт министрі қызметіне тағайындалды. Ал қызы Хадижат 2024 жылдың ақпанында Шешенстан басшысы әкімшілігі басшысының бірінші орынбасары болды. Тағы бір қызы Хутмат Қадырова денсаулық сақтау саласын қадағалайды.
