Шетелдік интернет-дүкендер миллиардтап табыс табады, бірақ салық төлемейді - Перуашев

Салық мәселесі: Үкімет мәліметі шындыққа жанаспайды

Перуашев былтыр 26 ақпанда шетелдік маркетплейстерге салық салу туралы депутаттық сауал жолданғанын еске салып, оған берілген ресми жауаптың нақты жағдаймен сәйкес келмейтінін айтты.

“Үкімет бұл платформалар 2022–2024 жылдары 83 миллиард теңге салық төлеген дейді. Бірақ 2023 жылы қазақстандықтар шетелдік онлайн-дүкендерден 505 миллиард теңгеге тауар сатып алған. Егер ҚҚС 12% болса, бюджетке 60 миллиард теңге түсуі тиіс еді. Алайда Үкімет көрсеткен 24 миллиард – бұл небәрі 4,8%. Бұл – жай арифметика”, – дейді депутат.

Оның айтуынша, кемінде 36 миллиард теңге бюджетке түспеген. Ал Үкіметтің шетелдік компанияларға жұмсақ қарап, отандық кәсіпкерлерге салықты қатаңдатуы – әділетсіз.

Баж салығы және әділетсіз бәсекелестік

Депутат Еуразиялық экономикалық одақ аясында баж салығынан босату шегін төмендету мәселесіне де тоқталды. Ол Үкімет бұл шешімді Қазақстан өз бетінше шеше алмайды дегенімен келіспейді.

“Қорғас секілді жерлерде азаматтар шекарадан күні бойы тауар тасып, ар-намысқа тиетін жұмыс атқарып жүр. Егер әділетті бәсекелестік болса, олар өз елімізде жақсы жалақы алатын жұмыс табар еді”, – деді Перуашев.

Шетелдік платформаларды жауапкершілікке тарту

Перуашев Үкіметтің шетелдік платформаларды Қазақстан заңдарына бағындыру мүмкін емес деген уәжіне қарсы пікір білдірді.

“Басқа елдер бұл компаниялармен келіссөз жүргізіп, жергілікті талаптарды мойындатқан. Біз де бірден бас тартпай, кем дегенде ұсыныс жасап, диалог бастаумыз керек еді. Егер Үкіметтің уақыты жоқ болса, онда келіссөз жүргізуге бизнес пен депутаттарға өкілеттік берсін”, – деді ол.

“Ақ жолдың” ұсынысы

Осы мәселелерді ескере отырып, «Ақ жол» фракциясы Үкіметке өз ұсыныстарын қайта қарап, оларды нақты жүзеге асыру мүмкіндігін қарастыруды сұрады.

“Күреспей жатып жеңілуге болмайды”, – деп түйіндеді депутат.