Ішкі істер министрінің орынбасары Игорь Лепеха Қазақстаннан шыққан жүздеген жалдамалы сарбаздың Ресей тарапында Украинадағы соғысқа қатысып жатқаны туралы ақпаратқа қатысты пікір білдірді, деп хабарлайды Ulysmedia.kz.
“Бұл сандардың қаншалықты шындыққа сәйкес келетінін білмейміз. Мұны қазір зерттеп, тексеру қажет”, – деді ол осыған қатысты сұраққа жауап бере отырып.
Сонымен қатар, Игорь Лепеха Қазақстанда жалдамалылықтың қылмыстық жауапкершілікке тартылатын әрекет екенін еске салды. Алайда, ол өткен жылы бұл қылмыс үшін қанша адамның жауапқа тартылғаны жөнінде нақты ақпарат бере алмады.
БҰҒАН ДЕЙІН
Украиналық “Хочу жить” ақпараттық жобасы 661 Қазақстан азаматының Ресей қарулы күштері қатарында Украина аумағындағы соғысқа қатысқан болуы мүмкін деген тізімді жариялады. 2024 жылдың соңына қарай олардың кемінде 78-і қаза тапқаны хабарланған.
Жоба авторларының мәліметінше, ресейлік вербовщиктер “жақын шетел” деп аталатын елдер – Қазақстан, Өзбекстан, Тәжікстан және Қырғызстаннан келген мигранттарды белсенді түрде нысанаға алып отыр.
