Түп тамыры Бельгиялан шыққан америкалық актер Жан-Клод Ван Дам Румынияда жүргізіліп жатқан қылмыстық тергеудің фигурантына айналды. Бұл тергеу адам саудасымен, оның ішінде кәмелетке толмағандарды сатумен айналысатын қылмыстық топқа қатысты жүргізіліп жатыр, деп хабарлайды Ulysmedia.kz порталы Батыс елдерінің БАҚ-тарына сілтеме жасап.
Румыниядағы ұйымдасқан қылмыс пен терроризмге қарсы күрес басқармасына берілген шағымға сәйкес, Жан-Клод Ван Дам адамды сексуалдық қызметтерді пайдаланғаны үшін айыпталып отыр. Зардап шегушінің адвокатының айтуынша, бұл оқиға шамамен 10 жыл бұрын Канн қаласында болған. Актердің румындық бес қыздың қызметін пайдаланғаны, оларды жезөкшелікке мәжбүрлегені туралы айтылады. Бір зардап шегуші тергеушілерге толық мәлімет берген. Бұл туралы румындық Hotnews порталы хабарлады.
Кездесулерді ұйымдастыруда делдал румын кәсіпкері Морел Боля болғаны туралы айтылады. Ол EuroDemos коммерциялық емес ұйымының президенті және Kasta Morrely модель агенттігінің иесі. 2022 жылы Морел Боля кәмелетке толмағандарды жезөкшелікке тарту ісінде негізгі фигурант ретінде танылған. Тергеу нұсқасы бойынша, 2000-2016 жылдар аралығында оның агенттігі мен НКО арқылы қыздар, соның ішінде кәмелетке толмағандар, психологиялық қысым, манипуляция және эмоционалды зорлық-зомбылық арқылы жезөкшелікке мәжбүр болған.
Ресми орган өкілдері шағымның тіркелгенін және Жан-Клод Ван Дамның есімі аталғанын растады, сонымен қатар тергеу ісі өндірісінде екенін хабарлады. Тергеу жалғасып жатыр.
