Перизат Қайратқа қатысты істі тергеу аяқталды. Оның анасын да соттағалы жатыр, деп хабарлайды Ulysmedia.kz.
Бұл туралы ҚМА төрағасының орынбасары Жеңіс Елемесов мәлімдеді.
- Жалпы 3,5 млрд теңге шығын келтірілген. Іс бойынша бір ғана сотталушы емес. Одан бөлек анасы бар. Ол кісі үйқамақта отыр. Екеуі де күдікті ретінде танылды. Анасының үстінен “алаяқтық” бабы бойынша іс қозғалды. Сонымен қатар, ақшаны жылыстату бабы бойынша күдікті. Ол қызына көмектесіп, түскен ақшаны өз шотына аударып отырған, дейді Елемесов.
ПЕРИЗАТ ҚАЙРАТТЫҢ ІСІ
Волонтер Перизат Қайрат «Көмекке жиналған 1,5 млрд теңгені жымқырған» деген күдікпен ұсталып, тергеліп жатыр.
16 қараша күні Қаржы мониторингі агенттігі Перизат Қайрат Палестинаға деп ақша жинап, тағы 200 млн теңге жымқырғанын растады.
Сондай-ақ Ulysmedia.kz ресми ашық дереккөздер арқылы Перизат Қайрат басқарған Biz Birgemiz қоры жайлы мәліметтерге үңіліп көріп, қордың бірнеше құрылтайшысы барын анықтады.
Перизатпен бірге «Amanat» партиясының да аты қатар аталып, ел ішінде түсініспеушіліктер пайда болды. Осыған байланысты «Amanat» партиясының басшылығы өздерін «Biz Birgemiz» қорының құрылтайшысы саналмайтынын мәлімдеді.
