2025 жылдың 3 сәуірінде Алматы әкімі Ауэзов ауданының тұрғындарымен кездесті. Әдеттегідей, бұл жиын да дау-дамайсыз өтпеді. Алматыдағы белгілі «әкімге қарсы күресуші», реновация бағдарламасы аясында оның төрт пәтерін сатып алу үшін 200 млн теңге талап етіп отырған Ернар Рахымжановтың өкілі, Досаевты жеке құрылысшыларға жер беріп жатқанын дауыстап айыптады. Әкім болса, «Көктем ғой, бәрін түсінемін» деп жауап беріп, Алматыдағы жер пайдалану саясатын түсіндірді. Бұл оқиғаға бүгін Ulysmedia.kz тілшісі куә болды.
Бізде ақша десе бәріне баратын адамдар бар. Өздері бұл жерге келмейді, тіпті Алматыда да тұрмайды, бірақ осында келгендер мен кездесуге қатысып отырғандардың барлығына жел беріп, дау-дамай ұйымдастырады. Негізінде, бәрі ақшаға байланысты. Біреу 4 пәтерін сатып, бірнеше миллион доллар алғысы келеді де, онысын ашық айтып, «маған кедергі келтірмей, көзден ғайып болсаңыз жақсы болар еді» деп тұспалдайды. Мейлі, әркімнің өз құқығы бар. Бірақ мен бұл төрт пәтерді сатып алмаймын.
Таныс адамдар көп. Сол баяғы мәселелермен келіп, шешіп беріңдер дейтіндер бар. Бірақ келісіп алайық, мен өте төзімді адаммын, мені әр кездесуде қажытып, мойындатуға тырыспаңыздар. Қолымыздан келетінін жасаймыз, – деді Досаев.
Бұл жағдайда әкім атышулы ескі үйдің иесі Ернар Рахимжановты меңзеп отыр. Билік оның төрт пәтерін сатып алу бойынша ортақ мәмілеге келе алмай жүр.
Бұл аумақта оның әпкесі мен анасының атына екі және үш бөлмелі пәтерлер рәсімделген. Рахимжанов екі бөлмелі екі пәтерін әрқайсысын 45 млн теңгеден сатуды көздейді. Ал 45 шаршы метрлік үш бөлмелі пәтерінің орнына жаңа үйден кемінде 130 шаршы метрлік үш бөлмелі баспана беруді талап етіп отыр. Тағы бір нұсқасы – төрт пәтерін түгелдей 200 млн теңгеге сату. Олар: 24 шаршы метрлік бір бөлмелі, 35,8 және 37,4 шаршы метрлік екі бөлмелі, сондай-ақ 44,1 шаршы метрлік үш бөлмелі пәтер.
Бұған дейін Алматы билігі бұл дауға қатысты осындай қысқаша мәлімет таратқан. Алайда мәселе әлі күнге дейін шешімін тапқан жоқ.
Кездесуде көтерілген негізгі сауалдар, әдеттегідей, құрылыс, жер пайдалану және жаңа нысандармен көршілес тұру төңірегінде өрбіді.
Досаевты президент тапсырмасын орындамады деп айыптады, бірақ әкім келіспейді. Алматыда президенттің нүктелік құрылысты тоқтату жөніндегі тікелей тапсырмасы орындалмай отырғанын айтып, Досаевқа бірнеше рет сын айтылды. Алайда әкім бұл айыптауларды түбегейлі жоққа шығарды.
Мен қалада тек сүріп, бұзумен айналысып жүрмін. Қай тұрғын үй кешені салынып жатыр екен, айта аласыздар ма? Тексеріп көрейік. Өйткені біз былтыр желтоқсанда құрылыс ережелерін бекіттік, мәслихат жаңа құрылыс регламентін қабылдады. Қаланы аймақтарға бөліп, құрылысқа қатаң шектеу қойдық. Тіпті статистикаға сүйенсек, қаладағы тұрғын үй құрылысы айтарлықтай төмендеді. Егер құрылыс нормалары бұзылған нақты деректеріңіз болса, айтыңыздар. Қазір қалада іргетасы қаланған барлық нысандарға қатаң шектеу қойылған. Мен учаскелерді қайтарып, сатып алып жатырмын. Біз негізінен осы іспен айналысудамыз, – деп түсіндірді Досаев.
ТҰРҒЫН ҮЙДІҢ ОРНЫНА – КОММЕРЦИЯЛЫҚ НЫСАНДАР
Алматыдағы ең өзекті мәселелердің бірі – жерді мақсатсыз пайдалану. Әуезов ауданының тұрғындары әкімге жеке тұрғын үй салуға бөлінген жер телімдерінде коммерциялық нысандар бой көтеріп жатқанын айтып, нақты мысалдар келтірді.
Біз қала құрылысы бақылау басқармасына жүгіндік. Олар заңбұзушылықтардың болғанын растады, бірақ меншік иесіне жерді талапқа сай пайдалануға ұсыныс берілгенін хабарлады. Егер жер телімі жеке тұрғын үй салуға арналған болса, онда тұрғын емес нысандар қалай заңдастырылмақ? – деп сұрады қала тұрғыны.
Әкім Алматыда тұрғын үйлердегі дүкендердің жартысы жеке тұрғын үй ретінде тіркелгенін айтады. Бұл мәселеге келгенде әкім Алматыдағы дүкендердің жартысы тұрғын үйлерде орналасқанын, олардың барлығы жеке тұрғын үй құрылысы (ИЖС) ретінде рәсімделгенін атап өтті.
Бізде кәсіппен айналысуға мүмкіндік беретін заңнама өте либералды сипатқа ие. Сондықтан көп жағдайда мұндай нысандар ресми түрде қызмет көрсету саласы ретінде тіркеледі. Біз тек құрылыс нормалары сақталмаған жағдайда ғана шара қолдана аламыз, яғни нысанның құрылымына қатысты мәселелер болса кірісеміз. Санитарлық-эпидемиологиялық бақылау, прокуратура бар. Сонымен қатар құқықтық статистика комитетінің Алматы департаменті жұмыс істейді. Тексеруді заңды түрде тіркеу үшін, оның қажеттілігін – азаматтардың өміріне қауіп төндіретін нақты факторларды дәлелдеу қажет, – деп жауап берді Досаев.
Десе де, әкім кейбір түйткілдерді шешуге уәде берді. Тікелей кездесу кезінде, мектептің спортзалында тұрған бойда жауапты тұлғаларға тапсырмалар берілді.
Кездесуде көтерілген басты мәселелердің бірі – балаларға арналған тегін үйірмелер мен секциялар жұмысы болды. Ата-аналар DamuBala жүйесінің жиі істен шығатынын, ваучерлерді пайдаланудағы қиындықтарды, қызметтерді сатып алу кезінде күмәнді жеткізушілердің қатысуын сынға алды.
Былтыр қоғамдық кеңестің жұмысы барысында бірқатар заңбұзушылықтар анықталды. Бірақ соған қарамастан, кейбіреулер еш қымсынбастан қайтадан өтінім берді, кейбір компаниялар атауын өзгертті, бірақ заңды мекенжайы сол күйі қалды. Ақша табуды жалғастыруға деген ұмтылысты түсінемін, бірақ біз арнайы ваучерлерді жаңартып, жүйені қайта іске қостық. Өйткені бюджет жылдық негізде бөлінеді – 1 қаңтарда басталып, 31 желтоқсанда аяқталады, – деп түсіндірді әкім.
Ол үйірмелер мен секцияларға қолжетімділікке байланысты мәселелерді шешуге қаланың барлық аудан әкімдерін жұмылдыратынын айтты.
Біз – балаларға 15 миллиард теңгеден астам қаржы бөлетін елдегі жалғыз өңірміз. Бұл деңгейді сақтап қалуға тырысып жатырмыз. Өкінішке қарай, адал жұмыс істемейтін жеткізушілер де аз емес, – деді Досаев.
Досаев Әуезов ауданының тұрғындарына бірқатар жобалардың іске асатынын мәлімдеді:
Мамырға дейін – Сайран көлі аумағы (47 га) 12,6 млрд теңгеге абаттандырылады;
Маусымға дейін – Ақсай-4, Мамыр-3, Жетісу-3 шағынаудандарында 3,9 млрд теңгеге 4 қоғамдық кеңістік жаңғыртылады;
Қыркүйекке дейін – ауданның барлық жарықсыз көшелеріне электр шамдары орнатылады;
Желтоқсанға дейін – 1,5 млрд теңгеге №16 қалалық емханаға күрделі жөндеу жүргізіледі.
